Despedimos o Entroido... pero non moito

—Porros asados Esta receita con tan só un ingrediente principal, os porros, ademais de sinxela é saudábel, é moi saborosa. Un moi bo xeito de gozar desta verdura que está en plena temporada. Elaboración: En primeiro lugar, lavamos ben os porros e cortámolos en dúas metades, a continuación, cortámolos lonxitudinalmente polo medio e colocámolos nunha bandexa apta para o forno, coa parte interior cara arriba. Picamos os dentes de allo ben finiños e botámolos por enriba dos porros, botámoslles tamén as herbas aromáticas ao gusto e finalmente un chorro abundante de aceite de oliva. Metemos no forno, que previamente quentamos a 180ºC, e deixamos uns 35 minutos até que os allos e os porros comecen a estar douradiños por enriba. Servimos quentes e, se queremos, podemos acompañalos dalgún mollo, a salsa Romesco ou o Alioli combinarán á perfección con esta receita. —Ñoquis de cabaza con San Simón Os ñoquis ou gnocchi son un tipo de pasta italiana que se fai principalmente con pataca cocida, fariña e ovo. Nesta receita, imos darlle unha volta e facelos de cabaza, e en lugar de fervelos como é habitual, cociñarémolos nun mollo de caldo de verduras e queixo San Simón. Elaboración: Comezamos cortando a cabaza en anacos. Colocámola nunha bandexa apta para o forno e asámola durante uns 45 minutos a 180ºC. Pasado este tempo, deberá estar brandiña, se non é así, podemos deixala uns minutos máis. Trituramos a cabaza cun batedor e botámola nun cunco grande xunto co ovo e un chisco de sal. Mesturamos todo ben e imos engadindo a fariña pouco a pouco, mentres remexemos para que se integre. Amasamos 5 minutos e formamos unha bola, que deixaremos repousar na neveira uns 30 minutos cun pouco de fariña por enriba. Unha vez repousada a masa, podemos comezar a darlles forma aos ñoquis. Para isto, botamos un pouco de fariña na mesa e nas mans para evitar que se pegue e imos collendo anacos de masa e dándolle forma alongada. Cortamos anaquiños do grosor dun dedo e botámoslles un chisco de fariña por enriba. Para formalos, podemos empregar unha táboa especial para facer ñoquis ou facelo coa axuda dun garfo, pasando a masa polos dentes deste para conseguir a forma. Deixamos repousar os ñoquis, para que sequen un pouco, e comezamos coa preparación do mollo, imos cociñar todo na mesma tixola, polo que precisaremos unha que sexa un pouco grande. Pelamos e cortamos a cebola en brunoise ben finiña. Botámola na tixola cun chisco de aceite e sal e deixámola tapada a fogo baixo até que fique transparente. Neste momento, engadimos os champiñóns, lavados e laminados e tamén incorporamos o entrefebrado. Cociñamos todo uns minutos até que estean case feitos. Engadimos un pouco de caldo de verduras, o suficiente para cubrir todo, e cando estea quente botamos os ñoquis. Subimos o lume ao máximo para que se evapore o caldo e deixamos cocer uns 3 ou 5 minutos, dependendo do tamaño que lles déramos aos ñoquis. Finalmente, engadimos o San Simón en anaquiños pequenos, remexemos todo ben até que se derreta o queixo e se integre ben co mollo. Servimos cun chisco de pementa moída por enriba. —As roscas de Dora Non hai Entroido ou Semana Santa no que miña nai non prepare estas deliciosas roscas, pero tamén gozamos delas durante todo o ano. Esta é a súa receita para que todas poidades probalas. Elaboración: Batemos o ovo co azucre cun batedor de globo durante uns minutos e engadimos o aceite pouco a pouco mentres seguimos batendo. Incorporamos tamén a reladura do limón e o anís e seguimos batendo. Engadimos a fariña, o lévedo e o sal, mesturamos ben todo e finalmente traballamos a masa coas mans sobre a mesa. Formamos unha bola e deixamos repousar durante unha hora cuberta cun pano. Despois do repouso, xa podemos comezar a facer as roscas. Imos ir formándoas mentres as fritimos. Para axudarnos a traballar a masa, podemos mollar un pouco as mans en aceite, así evitaremos que se pegue. Para darlles a forma, collemos pequenos anacos de masa e formamos pequenas boliñas, facémoslles un burato no medio cun dedo e estirámolas un pouco. Botamos abundante aceite nunha pota e, cando estea quente, comezamos a fritir as roscas. Retirámolas no momento en que estean douradiñas e colocámolas sobre papel absorbente para tirarlles o aceite sobrante. Finalmente, botámoslles azucre por enriba e podemos gozar delas en canto arrefríen un pouco.