A folga continúa na limpeza: "Non nos imos render"

Isabel Lacera é limpadora nun colexio público de Lugo mais traballa para Clece, unha grande empresa do sector que ten a concesión do servizo. Leva 66 días, ao igual que moitas das súas compañeiras, en folga para "conseguir un salario digno". Cobra 772 euros de salario base e 150 euros máis pola antigüidade acumulada (leva traballando desde o ano 2007 no seu posto), un total de 920 euros, a pesar de que ten unha xornada laboral de 39 horas semanais. En conversa con Nós Diario, mentres fica encadeada ás portas do Concello de Lugo no marco da reivindicación do persoal, Lacera denuncia que "o que queren, os da patronal, é absorber a nosa antigüidade dentro do salario mínimo [fixado en 1.080 euros], o que implicaría eliminar os trienios, cando a contía que ofrecen xa está fixada por lei". "Queremos que nos paguen o salario mínimo e nos respecten a nosa antigüidade", di Isabel Lacera "Queremos que nos paguen o salario mínimo e nos respecten a nosa antigüidade, posto que son os dereitos adquiridos durante moitos anos", incide a traballadora. "Agora mesmo estou cobrando por debaixo do salario mínimo traballando de 15 a 22 horas durante toda a semana e os sábados desde as 8 até as 12 horas", denuncia a limpadora. "O meu día a día é chegar ao colexio e limpar as zonas comúns, as aulas, varrer, fregar e limpar os baños, un traballo moi repetitivo que provoca moitas lesións nos ombreiros e nos pulsos", explica Lacera. "Non nolo teñen nada agradecido, deben pensar que imos alí a sentar no canto de a traballar", satiriza a operaria. "Cando estabamos na pandemia todos os días traballando lembrábanse de nós, e agora que somos, quérennos facer invisíbeis e non nos deron nin as grazas, tan só pedimos o salario marcado por lei e os nosos dereitos adquiridos", demanda. "Non nos chegan os cartos para vivir, hai familias que dependen exclusivamente deste salario e teñen que buscar outros traballos para saír adiante mentres a patronal enche as carteiras a conta dunhas traballadoras que cobran unha miseria", denuncia. "Se pensan que despois de todo este tempo imos recuar, deben saber que non, é un logo período para deixar todo así, para iso prefiro deixalo e nin asinar o convenio", sentencia. "Quen manexa a situación é Clece, unha destas empresas de Madrid que viñeron aquí funcionando a base de estabelecer soldos baixos e absorberon as pequenas empresas que había en Lugo", afirma. "Non é normal que nunha negociación dun convenio coa patronal de Madrid non só non se nos atenda en persoa, senón que a través dunha videoconferencia desde un coche, non teñen nin a dignidade de vir aquí e dar a cara, sentímonos indignadas", sinala a limpadora de Lugo. "Téñennos como se o noso salario fose un complemento do que ten o marido, polo simple feito de ser mulleres, se acontecese esta situación con homes isto non ía suceder", protesta. "Somos practicamente a totalidade mulleres no sector da limpeza, e por este feito abusan", engade. "Levamos dous meses sen cobrar con esta folga mais non imos abandonar, imos seguir facendo ruído", di Lacera. "As Administracións Públicas fanse eco de todas as nosas reivindicacións, mais nós levamos 66 días en folga e seguimos igual", continúa. "O que teñen que facer [as Administracións Públicas] é pór cláusulas a estas empresas que veñen de fóra e marcar unhas pautas para que non abusen das traballadoras e respecten os seus dereitos adquiridos", demanda. "Temos [na circunscrición de Lugo] o convenio máis baixo de todo o Estado, non nos imos conformar, estanse enriquecendo a base de empobrecernos a nós, os prezos soben e eu estou cobrando o mesmo que hai cinco anos", conclúe a traballadora. A limpeza de Pontevedra irá á folga o 10 de xaneiro A CIG, CCOO e UXT anunciaron esta cuarta feira a convocatoria dun día de folga no sector da limpeza de edificios e locais da circunscrición de Pontevedra o vindeiro 10 de xaneiro para "reclamar un convenio colectivo digno ante a insistencia da patronal en achegar propostas que supoñen afondar na precarización das condicións laborais das 11.000 persoas traballadoras do sector". A CIG acusa as Administracións de permitir "a escravización" na limpeza Dolores García, traballadora da limpeza en Vigo, ten unha xornada laboral de 23,5 horas á semana e cobra 800 euros, iso grazas á antigüidade, pois leva neste emprego desde o ano 2000. Porén, di, o salario base no sector está en 1.045 euros a xornada completa, é dicir, por baixo do salario mínimo. A García gustaríalle traballar máis horas cun contrato e cotizando por elas, mais na empresa tan só lle ofrecen facer horas extras. "A patronal está a rirse de todas as limpadoras, non caen do burro dunha suba de 2,66%, que tal e como está o cesto da compra non nos chega para nada", denuncia a limpadora de Vigo. "Unha xornada de loita" nas rebaixas Preacordo entre as dependentas da Coruña e Inditex: suba salarial de 322 euros mensuais Responsábeis dos tres sindicatos compareceron en Vigo para explicar que as asembleas de persoal da limpeza decorridas en Vigo e Pontevedra apostaron de forma maioritaria por levar a cabo "unha xornada de loita" coincidindo coas rebaixas de xaneiro para "intentar cambiar o rumbo" dunhas negociacións que se iniciaron o pasado 20 de febreiro. "Unha suba salarial de 2,66% para cada un dos tres anos de convenio (2023-2025), sen cláusula de revisión, é inaceptábel", consideraron os sindicatos.