O comité de empresa de Vitrasa, concesionaria do autobús urbano de Vigo, demandou esta cuarta feira a dimisión do alcalde, Abel Caballero, e mais do portavoz do Goberno local, Carlos López Font, por actuaren "da man" da empresa no conflito laboral que arrastran desde hai anos e por non seren capaces de "solucionar" a situación, cando fai 25 días o inicio da folga indefinida.
Nunha rolda de prensa, o órgano de representación dos traballadores, formado por delegados e delegadas de catro sindicatos, saíu ao paso das declaracións tanto do Executivo vigués como da propia empresa, e replicaron que, realmente, "é o Concello o que está a politizar o conflito", usando os mesmos argumentos que a propia Vitrasa —acusan CIG e BNG de estaren "detrás das protestas" para "danar" o servizo e a cidade—, e todo para "esquivar as súas obrigas".
Nestes termos pronunciouse o presidente comité, Imanol Arnoso (CIG), que subliñou que "non é serio" que un Goberno municipal faga esas formulacións. "Se non son capaces de solucionar isto, que o deixen, que marchen", incidiu, e, na mesma liña, volveu pedir á empresa que, se é certo que o servizo non é rendíbel e leva anos con perdas, "abandone" a concesión.
Arnoso subliñou que as negociacións para o novo convenio seguen bloqueadas, porque a concesionaria insiste en vincular calquera acordo ao reequilibrio económico por parte do Concello. Nese sentido, o comité denunciou que, malia que aínda non se sabe cal será a compensación que pagará a Administración local, "a empresa xa está a dicir que será insuficiente".
Após volver criticar que Vitrasa non fixo máis que "devaluar" o servizo público de transporte urbano de Vigo, negou as afirmacións da dirección da empresa sobre o apoio á folga. Segundo lembrou o presidente do comité, nunha votación na que participaron 244 traballadores —dos 350 aproximadamente que ten en nómina—, 214 votaron a favor de manter as mobilizacións e, dentro diso, "gañou a folga indefinida".
Finalmente, o comité volveu desmarcarse dos actos vandálicos que se viñeron rexistrando nos últimos meses, con lanzamento de obxectos e danos en varios vehículos da frota de Vitrasa. Con respecto ao traballador ferido nas últimas horas, Imanol Arnoso matizou que foi trasladado a Urxencias "por precaución", pero que "xa está a traballar outra vez" e "non ten nada".
Por outra parte, Imanol Arnoso informou de que os sindicatos elaboraron unha nova plataforma coas súas demandas para a negociación do convenio, dado que a anterior data de 2020 e tivo que ser "actualizada". Así, o comité pide que se actualicen os seus salarios, que levan tres anos conxelados, e lembra que os traballadores, que "agora mesmo están a perder un 16,5% de poder adquisitivo", tamén necesitan "un reequilibrio económico". A iso súmanse outras melloras nas condicións de traballo, como a regulación do descanso ou a adecuación das rutas e horarios "á realidade da cidade".
O persoal, "abandonado"
O vicepresidente do comité, Noli Núñez (CCOO), incidiu en que a folga indefinida é mesmo "rendíbel" para a empresa, que ten a metade de gastos, ao ter en activo menos buses e a metade do cadro de persoal parado, pero con todos os autocares cheos. "Nós somos os sufridores do conflito. Nós somos os que estamos todos os días ás 5 horas nas instalacións para controlar os buses que saen. Estamos desexando chegar a un acordo, por nós e polas nosas familias. Isto non é broma, é algo moi serio", subliñou, e tachou de "vergoñento" que, neste conflito, o Goberno local "vaia da man" da empresa e deixe "abandonados" os traballadores.
Na mesma liña, Rosa Pampillón (UXT) tamén salientou que "é sorprendente" que o alcalde "mire para outro lado" cando a empresa concesionaria "basea a súa xestión nos incumprimentos". Así, ademais dos numerosos requirimientos na Inspección de Traballo, puxo como exemplo o Plan de Igualdade de Vitrasa, que "está caducado" e, pese a iso, o Concello prorrogou en 2020 por cinco anos máis a concesión.
