A coordinadora de Vía Galega, plataforma en defensa dos dereitos nacionais da Galiza, composta de 61 entidades de diversos ámbitos, vén de convocar para o 24 de abril unha manifestación nacional que percorrerá as rúas de Compostela.
176 anos do "abril de lume e ferro"
A escolla desta data ten como motivo o 176 aniversario da Revolución galega do “abril de lume e ferro” -en palabras de Manuel María- de 1846, un dos episodios máis importantes da historia da Galiza e que infelizmente culminou cos fusilamentos dos “mártires da liberdade”.
A coordinadora fixo fincapé onte en que “todas as que anhelamos unha Galiza dona de seu temos unha cita en Compostela este 24 de abril”.
A Deputación de Lugo denuncia o ataque na mostra de Vía Galega
A Deputación de Lugo vén de presentar unha denuncia ante a Policía polos danos causados á mostra Galiza. Un pobo, unha selección. A exposición foi estragada nun ataque que resultou coa rotura de máis da metade dos paneis e cuns custos que se estiman en 1.380 euros.
Após a reposición das lonas, que se levará a cabo nos vindeiros días, poderase visitar até o 14 de febreiro na lucense praza de San Marcos.
A mostra, organizada pola plataforma Vía Galega coa colaboración da Vicepresidencia da Deputación de Lugo, repasa a historia do deporte galego, afonda na participación de deportistas do país en competicións internacionais e reclama que a Galiza compita con seleccións propias en competicións internacionais, como fan outras nacións sen Estado como Gales ou Escocia.
