A plataforma social Vía Galega presentou esta quinta feira en Lugo o número cero da revista Galiza no deporte, unha publicación divulgativa, promovida pola Vicepresidencia da Deputación de Lugo, que repasa a historia deportiva da Galiza, achegando información sobre a historia das seleccións e das participacións olímpicas de deportistas do país.
"Fúrtasenos o dereito a competir, agás no fútbol gaélico, como galegas e galegas en todas as modalidades e disciplinas deportivas, tanto en torneos oficiais como internacionais", sinalan no seu editorial, polo que apuntan á necesidade de "unir todas as forzas para modificar a lexislación e romper a nosa subordinación das federacións españolas e, así, poder competir oficialmente".
A aparición desta revista enmárcase dentro da campaña que Vía Galega vai desenvolver por toda a Galiza, co obxectivo "de levantar un amplo movemento, exixindo o dereito a formar seleccións en todos os deportes para competir a todos os niveis, galeguizar o deporte e impulsar a igualdade de xénero". Alén da revista, contará cunha exposición con varios bloques temáticos que abranguen desde o fútbol até os deportes tradicionais.
Reportaxes, entrevistas e unha mesa redonda
A publicación, da que se lanzaron 5.000 exemplares, conta con reportaxes sobre a historia do deporte en Lugo, modalidades acuáticas, tríatlon, fútbol gaélico e loita galega ademais de entrevistas a Belén Toimil, Chano Rodríguez e Ezequiel Mosquera.
No seu interior tamén hai unha mesa de debate na que participan os xornalistas Afonso Eiré, Noela Rei Méndez, Silvia Carregal e Héctor Pena. A revista inclúe o manifesto "Galiza, un pobo, unha selección" asinado, entre outras persoas, por Fernándo Vázquez, Pili Neira, Pedro da Silva e Xulia Vaquero xunto a numerosas e numerosos deportistas da Galiza.
Contidos para dignificar o noso
O coordinador dos contidos da revista é o xornalista Héctor Pena, responsábel de Deportes de Nós Diario e de publicacións como Historia do Trofeo Teresa Herrera. Explica ao xornal que a publicación ten dúas vertentes, "por un lado reivindicar o dereito a competir oficialmente por parte das seleccións deportivas galegas e por outro explicar o alto nivel que temos no país".
Este é o motivo de que a escolma de protagonistas e modalidades introducira nomes coñecidos do pasado e do presente en competicións internacionais, como é o caso dos Xogos Olímpicos e Paralímpicos.
"Queremos mostrar non só que é posíbel competir, tamén podemos gañar títulos como aconteceu co fútbol gaélico", sinala Pena. De entre as páxinas de Galiza no Deporte, este xornalista subliña unha reportaxe sobre a loita galega, un dos 64 deportes e xogos populares da Galiza catalogados en situación de perigo de extinción. "É propia nosa e era tan importante que Rosalía de Castro chegou a escribir un dos seus poemas sobre ela", relata Pena.