O vicepresidente primeiro da Xunta da Galiza e conselleiro de Presidencia, Xustiza e Turismo, Alfonso Rueda, non quixo revelar esta sexta feira se será el quen suceda o presidente do Goberno galego, Alberto Núñez Feixoo, no caso de que finalmente sexa elixido novo líder do Partido Popular a nivel estatal.
"Eu e o resto das persoas do Goberno e as persoas das que se está a falar estamos a disposición do que toque facer, e eu aí non vou ser a excepción", indicou, en declaracións aos medios antes de participar nun acto en Vigo.
Rueda explicou que é Feixoo "o que marca os tempos" e haberá que esperar a ver que acontece o próximo mes de abril, cando o PP elixa o seu novo presidente no Congreso extraordinario.
Preguntado sobre se a nivel persoal aceptaría presidir a Xunta se así llo propuxesen, Rueda indicou que polo de agora non tivo ese ofrecemento e eludiu "falar de hipóteses". "Bastante teño co meu traballo do día a día e coas responsabilidades que teño agora", subliñou.
Aguirre loa Feixoo
Por outra parte, a ex presidenta da Comunidade de Madrid, Esperanza Aguirre, asegurou esta sexta feira que Feixoo será "unha grande axuda para a política española e europea" e, con el, "por suposto que o PP se recuperará".
"É a persoa máis axeitada por experiencia, intelixencia e carreira para dirixir o PP", enfatizou Aguirre.
Na mesma liña se pronunciou Enrique López, conselleiro de Presidencia, Xustiza e Interior de Madrid e a quen a prensa estatal situaba como o "favorito" de Xénova para suceder Isabel Díaz Ayuso na Comunidade: "Estou a disposición do partido e de quen vai ser o seu presidente, Alberto Núñez Feixoo, que ten todo o meu apoio e colaboración", aseverou.