O PSdeG denunciou as prácticas "clientelares e electoralistas" do PP ante as próximas eleccións galegas do 18 de febreiro, con 500 millóns de euros en axudas e diversas subvencións recollidas no Diario Oficial de Galiza nos primeiros 15 días do ano, "cifras moi superiores" a outros arranques de ano.
"O PP pon á Xunta ao seu servizo. Baleiran as arcas públicas utilizando as peores prácticas caciquís", aseverou a candidata socialista número tres por Lugo, Mayra García, que deu unha rolda de prensa esta cuarta feira canda á cabeza de lista do PSdeG pola Coruña, Patricia Iglesias. Estes 500 millóns, segundo os cálculos dos socialistas en base ás publicacións do DOG, denotan o "nerviosismo" que hai no PP, que "pretende facer nun mes o que non fixo en 15 anos".
Ante isto, apuntaron as candidatas, os galegos e galegas sofren a "desidia e abandono" da Administración autonómica, que "só se acorda deles cada catro anos". "Cada vez que hai un problema na Galiza, o único que fai a Xunta é derivar responsabilidades. Ponse de perfil e declárase incompetente; incompetente para solucionar os problemas en atención primaria, no ámbito educativo ou no transporte, inexistente no rural", censurou García, que insistiu a este respecto na "política do cheque" da Xunta, "medidas electoralistas no canto de solucións reais".
Insiste na idea do uso "partidista" do diñeiro público por parte de Rueda e a este respecto lembrou que a Xunta Electoral de Galiza (XEC) atendeu unha denuncia formulada polo PSdeG e ordenou á Xunta que retirase da súa páxina web a información sobre un acto no que o presidente da Xunta e o alcalde de Ferrol, José Manuel Rey Varela, asinaron o convenio do proxecto 'Abrir Ferrol ao mar' ao apreciar que existe "unha vulneración do deber de neutralidade".
"Buscan confundir os galegos para adulterar o resultado electoral", alerta, engadindo como exemplo o anuncio do 'Bono Coidado' sobre o que o Colexio de Traballo Social argumentou que "non é unha axuda nova", senón "unha actualización das libranzas" o Colexio de Traballo Social remitise á Xunta un escrito no que lle instan a "rectificar" e aclarar os termos da medida, argumentando que "non é unha axuda nova", senón "unha actualización das libranzas".
"Todo se resume en bonos, mais con bonos non se solucionan os problemas reais dos galegos. Soluciónanse cunha planificación apropiada dos servizos; cunha aposta clara polos servizos públicos", reivindicou García, afeando que o PP "só cre no modelo privatizador, de negocio".
Por todo isto, defenderon que o "mellor candidato para a Galiza" é José Ramón Besteiro, "ao que fai sete anos tentaron quitar do medio cuns anónimos entregados por Elena Candia, á que agora premian como cabeza de lista en Lugo por ese xogo sucio".
Pola súa parte, Patricia Iglesias puxo en valor as últimas medidas aprobadas polo Goberno estatal, "un Goberno progresista", e contrapúxoo á actitude do PP, "que cando están nas institucións, moi ben, pero cando non, todo é confrontación".
"Curioso tamén ese ataque co tema dos bulos e as redes sociais, que falen de manipulación, cando están a manipular un medio público como é a CRTVG", apuntou Iglesias.
