O Partido Popular usou a súa maioría na Cámara para evitar esta cuarta feira a aprobación dunha proposición non de lei presentada polo PSdeG, e que si tivo o apoio do BNG, na que se instaba ao Goberno galego ao "rexeitamento da práctica dos ventres de aluguer" e a pedir ao Estado que "evite esta práctica".
A viceportavoz do grupo do PP, Paula Prado, argumentou para defender o posicionamento do seu partido que os ventres de aluguer “é unha realidade moi delicada e extremadamente sensíbel polo que require un debate en profundidade, serio e sereno”. “A nosa sociedade ten evolucionado nos últimos anos e o Partido Popular quere atender e afrontar con rigor todas as necesidades que teñen hoxe as familias”, apuntou.
Ademais, comparou os ventres de aluguer coa doazón de órganos ao alegar que "é doar capacidade reprodutiva".
-
![]()
-
"Posición afín á ultradereita"
Noa Díaz (PSdeG) reprochou ao grupo que sustenta o Goberno da Xunta que a súa posición "sexa cada vez máis afín á da ultradereita de Vox". Díaz denunciou que esta "industrialización" dos ventres de “mulleres vulnerables”, coñecido co "eufemismo da xestación subrogada", é unha praxe “egoísta”, que emprega as mesmas "tácticas criminais que as redes de tráfico e trata de seres humanos". "O ventre de aluguer é unha violencia contra a muller", denunciou a deputada.
Pola súa parte, Olalla Rodil (BNG) lembrou que esta non é a primeira vez que o PP evita apoiar declaracións ou iniciativas neste sentido. "Vostedes cren que os nenos e nenas se poden comprar, como se estivesen nun catálogo de Zara", preguntou Rodil á bancada do PP.
A nacionalista afirmou que "satisfacer" o desexo, "lexítimo", de maternidade ou paternidade "non pode estar por riba dos dereitos humanos".
