A candidata á Presidencia da Xunta da Galiza, Ana Pontón, comprometeuse esta cuarta feira en Ourense a "defender o rural de todas aquelas medidas que se tomen en contra dos produtores galegos, en Madrid ou en Bruxelas". Tamén a "garantir prezos xustos e reducir burocracia". "Estamos a falar de explotacións no sector agrogandeiro, non de xestorías", argumentou nun acto público decorrido en Ourense.
A nacionalista lembrou que o Bloque "sempre estivo a carón do rural, defendendo os seus intereses contra as políticas da Unión Europea que limitaban a capacidade galega de produción". "E faciamos esa defensa en solitario, cando cuestionar as políticas da PAC era pouco menos que anatema (...). O tempo deunos a razón tamén nisto", apuntou.
"Non é normal que a xente do rural faga o traballo duro e encha a neveira das nosas casas con alimentos de calidade, pero sexan outros os que queden cos beneficios", censurou Pontón, que tachou de "inaceptábel" que teñan que traballar "por baixo dos custos e perdendo diñeiro", mentres os prezos dos alimentos están "disparados".
Considera que, "fronte ao abandono do PP", o BNG xa demostrou "ter un proxecto sólido e solvente para o medio rural" e puxo como exemplo algunhas das medidas impulsadas polo bipartito. Entre elas, o banco de terras "como instrumento para ampliar a base produtiva das explotacións agrarias" fronte a un PP que "copiou mal" a iniciativa e que "puxo grandes polígonos forestais en mans de fondos de investimento que só queren especular coa terra".
Nesta mesma liña, defendeu a iniciativa nacionalista para garantir prezos xustos con contratos homologados, "unha medida suprimida polo PP". "Pero imos volver a pólos en marcha para que os produtores de carne ou de pataca en Ourense e no conxunto do país poidan ter prezos xustos e non teñan que traballar por baixo de custos", comprometeu.
A este respecto, avanzou que se chegan á presidencia da Xunta acabarán coa burocracia que "só serve para pór atrancos e para sobrecargar a xente do rural", unha reclamación "compartida" co sector agrogandeiro.
Debate de RTVE
Por outra banda, Pontón tamén aproveitou a súa intervención en Ourense para pedir ao candidato do PP, Alfonso Rueda, que "deixe de esconderse" e acuda, non só ao debate de RTVE, senón que acepte tamén un cara a cara con ela, "o mínimo en democracia, tal e como demostraron Pedro Sánchez e Alberto Núñez Feijóo nas pasadas eleccións estatais".
"Resulta incomprensíbel que alguén que se presenta a unhas eleccións renuncie a defender o seu proxecto nos debates ou a manter un cara a cara coa líder da oposición", sinalou Pontón, que se preguntou se o PP "quere esconder ao seu candidato".
"Quizais o problema que ten o candidato do PP é que non ten nin programa, nin ideas que contrastar e por iso prefire esconderse", sinalou a nacionalista, destacando ademais que cando alguén se presenta a unhas eleccións está "na obrigación" de "dar a cara ante a cidadanía porque debater non é un dereito dos candidatos, é un dereito da cidadanía".
Ana Pontón concluíu destacando que a Galiza necesita "un Goberno e unha presidenta que achegue solucións para deixar atrás os 15 anos de nefasto legado que deixa o PP". Para iso, apelou a unha mobilización "masiva" que permita "poñer en marcha o mellor goberno de todos os tempos concentrando o voto de cambio no BNG".
"Se queremos resultados diferentes, temos que apostar por algo diferente", animou, presentándose ademais a si mesma como "a candidata desa maioría social que quere cambio e un futuro mellor". "Non importa que papeleta escollesen noutras eleccións porque hai moitas maneiras de sentirse galego ou galega e todas son necesarias para pór en marcha unha nova Galiza (...). Son a candidata de todas as persoas que queren cambio e que saben que a maneira de conseguilo é apostando polo BNG", concluíu.
