O Goberno español decidiu fuxir da polémica xerada polo resultado do Benidorm Fest, despois de que gran parte do público, formacións políticas -entre elas o BNG e Galiza en Común- e asociacións culturais denunciasen as presuntas irregularidades cometidas polo xurado profesional á hora de escoller a gañadora do certame músical.
A ministra de Política Territorial e Voceira do Goberno estatal, Isabel Rodríguez, foi cuestionada polo ocorrido durante a gala e pola posición do Executivo. Porén, Rodríguez non quixo opinar sobre o feito de que os sindicatos de RTVE esixisen á dirección do ente público "deixar sen efecto" a designación da gañadora, Chanel, como representante de Eurovisión.
A cantante e bailarina impúxose ás Tanxugueiras e a Rigoberta Bandini polo voto do xurado, a pesar de que as galegas obtiveron a máxima puntuación do voto demoscópico e do popular.
Lonxe de dar unha resposta, Rodríguez optou por esquivar o debate, e afirmou que "o único concurso europeo no que está centrado este Goberno, como saben vostedes, é o do cumprimento do plan de recuperación".
Xunto a Isabel Rodríguez compareceron ante os medios a ministra de Transportes, Raquel Sánchez, e a ministra de Políticas Sociais. Tampouco elas manifestaron a súa posición con respecto á polémica, mais a titular de Políticas Sociais comentou que prefire calar o que pensa "sobre a canción" gañadora.
Piden explicacións polo xurado
Galicia en Común foi a primeira formación política en comunicar que presentaría unha solicitude de comparecencia dos responsábeis de RTVE para aclarar o proceso de selección do xurado profesional e se este ten algún tipo de relación coa gañadora do Benidorm Fest.
Pouco despois, o BNG tamén se manifestou nos mesmos termos. O deputado do Bloque no Congreso, Néstor Rego, adiantou nas súas redes que a formación nacionalista ía presentar unha serie de iniciativas na cámara baixa co obxectivo de poder acabar coa "falta de transparencia" do certame.
A seguinte en posicionarse foi a sección sindical de Comisións Obreiras (CCOO) en RTVE, que asegurou nun comunicado que a escolla da representante española para Eurovisión "debería quedar sen efecto" mentres non se investigan as presuntas irregularidades cometidas.
Ademais, sete senadores do Partido Popular presentaron unha batería de preguntas á dirección do medio público para que conteste se sabía dos vínculos entre polo menos unha das integrantes do xurado e a gañadora.