Esta terza feira decorreu en Compostela a sinatura do acordo para os orzamentos municipais de 2022 entre o PSdeG e Compostela Aberta, por parte dos seus voceiros, Sindo Guinarte e Marta Lois respectivamente.
O PSdeG sinalou que o pacto se desenvolve arredor de tres eixos fundamentais: os obxectivos para avanzar na recuperación económica e social da capital da Galiza, continuar co cumprimento de acordos anteriores, e as medidas novas para a recuperacións despois da pandemia.
O documento salienta que no contexto actual é "imprescindible" que as forzas políticas alcancen acordos mentres a sociedade "loita por ir saíndo da situación pandémica causada pola covid-19 e as súas variantes".
O PSdeG incidiu na presenza no acordo de políticas sociais e de igualdade, impulso das instalacións educativas, mellora nos barrios, investimentos no rural, ou un plan de reindustrialización.
Ademais, o texto recolle a integración da praza do Matadoiro no parque de Belvís, a cuberta do pavillón municipal do CEIP Quiroga Palacios, parques biosaudábeis, a humanización do Campus, o plan de accesibilidade universal para a mellora da accesibilidade e a eliminación de barreiras arquitectónicas dos distintos barrios da cidade.
Pola outra parte, Lois subliñou a vontade de retomar os orzamentos participativos, o Plan Municipal de Canguraxe e a licitación dun Plan Municipal de Xuventude, así como unha partida de 300.000 euros para efectuar o treito da Vía Verde que percorre a cidade.
Abstención de Compostela Aberta
Para que os orzamentos vexan a luz, a voceira transmitiu que Compostela Aberta absterase, destacando que o voto favorábel non é unha opción por cuestións como "as políticas sociais que para nós deben ser prioritarias, e máis no contexto actual aínda marcado pola pandemia".
Con respecto aos temas nos que non foi posíbel chegar a un acordo, Lois sinalou a Renda Infantil ou a situación das persoas sen fogar.