luns 18/10/21

O BNG exixe frear os parques de máis de 50 MW que colidan co Plan Eólico

Nunha moción que non saíu adiante polo voto en contra do PP, demandou ao Estado as competencias en materia de planificación enerxética.
A deputada nacionalista Noa Presas defendeu onte unha moción no Parlamento para demandar ao Estado as competencias en materia de planificación enerxética (Foto: Nós Diario).
A deputada Noa Presas defendeu unha moción para demandar ao Estado as competencias de planificación enerxética (Foto: Nós Diario).

A deputada e portavoz de Enerxía do BNG, Noa Presas, defendeu nesta terza feira unha moción no Pleno da Cámara galega contra o modelo eólico da Xunta, que cualificou de "inxusto, antigalego e insostíbel", e, pola contra, propuxo unha nova planificación baseada "na ordenación, a participación pública, a defensa do autogoberno e os intereses galegos".

Nesta liña, Presas urxiu a paralizar "calquera proxecto eólico superior a 50 megawatts (MW) que colida contra o Plan Sectorial Eólico ou con calquera categoría de protección ambiental" e que poida ocasionar "unha irreversíbel afectación ambiental, social ou económica".

Traspaso de competencias

Aliás, a deputada demandou ao Goberno estatal executar as "modificacións oportunas" da Lei 24/2013 do sector eléctrico, co gallo de que Galiza "poida exercer as competencias a respecto das instalacións de produción enerxética", en alusión aos numerosos proxectos que está a tramitar o Ministerio para a Transición Ecolóxica.

Na actualidade, dixo, o país vive "un auténtico terremoto no sector enerxético", alén do "boom eólico descontrolado que está a ser parte dos problemas sociais e económicos no canto de contribuír a ser parte da solución", salientou, facendo referencia tamén ao recente incremento do prezo da electricidade.

"Temos marxe para planificar, e temos dereito a facelo", afirmou.

Noa Presas concluíu a súa intervención reclamando para Galiza un novo Plan Eólico, "habilitando maiores zonas de exclusión que incorporen as zonas previstas de ampliación da Rede Natura 2000".

Porén, a moción foi rexeitada polo voto en contra da bancada popular.

comentarios