A alcaldesa de Rairiz de Veiga, Asunción Morgade, que logrou o bastón de mando municipal baixo as siglas do PP, fichou polo PSdeG e será a súa candidata nos comicios locais do 28 de maio.
Así o confirmaron fontes da dirección socialista, que recalcaron que agora Morgade traballa na confección completa da candidatura.
Outras fichaxes
E é que Rairiz de Veiga é coñecido por ser un concello con moitas fichaxes e movementos entre partidos. Morgade chegou á Alcaldía de Rairiz de Veiga en 2015 tras a dimisión do seu antecesor, Xosé Xaquín Rodríguez Ambrosio, quen foi condenado a oito anos e medio de inhabilitación por prevaricación. Rodríguez Ambrosio fora fichado, á súa vez, polo PP, tras estar na Alcaldía co BNG.
A dirixente era a tenente de alcalde e en 2019 foi a candidata popular. Tras os comicios mantívose na Alcaldía.
Con todo, para os comicios deste 2023, a dirección do PP que encabeza Manuel Baltar anunciou que o candidato sería Camilo Fernández Freire. Ela avanzara a súa intención de presentarse igualmente.
