Un total de 138.601 galegos xa exerceron o seu dereito a voto a través de sistema de correo, é dicir, 6,2% do censo total de residentes nas catro circunscricións da Galiza xa optou por manifestarse nos comicios do 23 de xullo. Con estes datos, facilitados por Correos e que fan referencia ao fechamento da xornada da quinta feira —último día para votar en procesos habituais pero que se estendeu até esta sexta feira ás 14 horas—, o voto por este sistema multiplica por tres ao emitido así nas últimas estatais de 2019, cando foron 44.301 votos os recibidos en custodia a última quinta feira de campaña electoral.
Cos datos actuais, en xeral en todo o Estado, a diferenza entre solicitudes e votos admitidos sitúase actualmente en 6,1%, por baixo da ratio habitual en todos os procesos electorais —7,8% en abril de 2019; 6,6% en xuño de 2016, e unha media de 7,3% considerando todas as eleccións estatais decorridas desde 2008—.
Na Galiza, exerceron o seu voto 56.307 persoas na Coruña; 41.776 en Pontevedra; 20.468, en Ourense; e 20.050, en Lugo. Se o comparamos coas eleccións estatais de 2019, son algo máis de tres veces máis na Coruña, preto do triplo no caso de Pontevedra e 3,5 veces máis no caso de Lugo, a que máis sobe en voto por correo en relación ao proceso anterior.
A feche do prazo para solicitar o voto por correo, contabilizáronse na Galiza un total de 146.144 solicitudes de voto por correo para as eleccións estatais do 23 de xullo na Galiza, o que supuxo tamén máis do triplo con respecto a 2019. Desta maneira, xa exerceron o seu voto 94,5% dos galegos que o solicitaron.
Datos estatais
No conxunto do Estado, 93,8% das 2.622.808 solicitudes de voto por correo depositaron xa a súa papeleta, é dicir, un total de 2.461.284 electores e electoras até a medianoite da quinta feira. Son as máis altas da historia da democracia, ao ser 98% máis que nas eleccións do 28 de abril de 2019 e 81% máis que nas do ano 2016.
Ás 00.00 horas desta quinta feira, 2,4 millóns de solicitantes do voto por correo depositaran o seu sufraxio e esta sexta comezou cun total de 161.524 electores que faltaban por introducir a súa papeleta cando finaliza o prazo ás 14 horas, unha ampliación que fixo a Xunta Electoral Central (JEC) a pedimento da sociedade estatal.
Nos últimos días, o candidato do PP á Presidencia, Alberto Núñez Feixoo, alimentara as dúbidas a respecto do voto por correo: "Pido aos carteiros de España que traballen ao máximo, mañá, tarde e noite e, aínda que non teñan os reforzos suficientes, que saiban que custodian algo que é sacro dos españois, que é o seu voto. Pido un esforzo aos carteiros, con independencia de que os seus xefes non faciliten o seu traballo, tal e como din os sindicatos de Correos, que acusan [Pedro] Sánchez de tentar impedir que a xente vote", dixo a pasada semana, aludindo a unha suposta fraude.
