Malia gañar o “non” no referendo de setembro de 2014, o soberanismo escocés experimentou desde entón un gran crecemento. A deputada escocesa Christina MacKelvie informa de que a militancia do Scottish National Party (SNP) multiplicouse por cinco desde entón. O aumento do soberanismo tamén ficou patente nas eleccións ao Parlamento de Westminister, onde arrasaron con 56 dos 59 escanos dispoñíbeis.
Neste contexto, a parlamentar escocesa vén de recoñecer na Universitat Catalana d’Estiú (UCE) que o SNP se prepara para convocar un segundo referendo, “con independencia de se Londres di si ou non”. A escocesa sinalou que “hai un ano moita xente votou non a cambio de máis autogoberno, mais agora votarían si, porque as promesas esfumáronse”.
As eleccións de maio do próximo ano poderían ser o ensaio dun novo referendo. Polo de agora, MacKelvie salienta que as enquisas favorecen o SNP, pois obtería 79 deputados e deputadas dos 129 escanos da Cámara. Isto suporía que o partido nacionalista incrementaría en 14 os parlamentares cos que conta a día de hoxe.
Na UCE, a deputada nacionalista descartou unha Declaración Unilateral de Independencia, xa que incumpriría os compromisos e os principios das Nacións Unidas e mais os tratados internacionais. Sobre a posíbel data da nova consulta, MacKelvie dixo que hai que ser prudentes, pois esta vez ten que gañar o “si”.