As forzas rebeldes de Donetsk toman a televisión e capturan altos mandos militares

O Goberno de Ucraína, co Exército ruso a un paso das súas fronteiras, sufriu novos reveses no sureste do país, onde os manifestantes tomaron a radiotelevisión da rexión de Donetsk e o Servizo de Seguridade admitiu a captura de tres dos seus oficiais polas milicias rebeldes.

A toma da radiotelevisión produciuse logo dun mitin na praza Lenin da cidade de Donetsk en respaldo do referendo sobre a autonomía da rexión homónima convocado polos contrarios ao novo Goberno para o próximo 11 de maio, consulta declarada ilegal polas autoridades de Kiev.

Así mesmo, a Organización para a Seguridade e Cooperación en Europa (OSCE) confirmou que os milicianos rebeldes e achegados a Moscú liberaron a un dos sete militares europeos retidos desde hai tres días.

"A equipa da OSCE que levou as conversas en Slaviansk sobre os observadores puido abandonar o lugar xunto a un dos inspectores militares, un cidadán sueco que ten un problema de saúde", sinalou en Viena unha portavoz da organización.

Ucraína despregou forzas militares na fronteira con Rusia namentres as potencias occidentais lideradas por Estados Unidos preparan novas sancións ao goberno de Moscova.