O xornal eldiario.es puxo rostro esta terza feira á familia de Luis Medina Abascal, un dos investigados, xunto ao empresario Alberto Luceño, polo presunto cobramento de comisións na venda de máscaras ao Concello de Madrid, motivo polo que a Fiscalía Anticorrupción os acusa dos delitos de estafa, falsidade documental e branqueo de capitais.
Medina Abascal pertence a unha das principais familias da aristocracia do Estado español, a Casa de Medinaceli, e actualmente ostenta o título de marqués de Villalba.
Tal e como recolle eldiario.es, o avó do investigado, Rafael Medina y Villalonga, tomou as armas en 1936 e participou do golpe de Estado militar que derrocou a autoridade republicana, alén de se integrar na chamada Garda Cívica, que protagonizou algunhas das escenas máis crueis da represión franquista en Andalucía.
Unha vez instaurado o réxime ditatorial de Francisco Franco, Medina foi nomeado alcalde de Sevilla (1943-1947) e, posteriormente, procurador nas Cortes españolas.
A investigación
Segundo o escrito da Fiscalía, Medina Abascal foi quen contactou co Concello para ofrecerse como intermediario na compra das máscaras en marzo de 2020, "aproveitando a súa condición de persoeiro coñecido na vida pública e a súa amizade cun familiar do alcalde de Madrid [José Luis Martínez-Almeida]". Trátase, en concreto, de Carlos Martínez-Almeida, curmán do rexedor e avogado que opera no sector privado.
Fiscalía afirma na súa querela que ambos os empresarios venderon luvas de "ínfima calidade" e test de detección da Covid-19 que resultaron ser "defectuosos".
Luis Medina tería percibido unha comisión dun dólar por máscara, polo que a contía total roldaría o millón de dólares, uns cartos cos que mercou un iate valorado en 325.000 euros.
"Disto inférese que o prezo real de venda das máscaras era de 2.689.300 dólares e que os acusados o inflaron artificialmente para levar como beneficio neto da operación 4.000.000 dólares; é dicir, 148% do prezo real do produto", sostén Anticorrupción.
Pola súa parte, Luceño, o encargado de mercar o material, teríase enriquecido con case 5 millóns de dólares.
