O vindeiro 15 de novembro, o Consello de Asuntos Xerais da Unión Europea (UE) decidirá sobre a oficialidade do galego no ámbito comunitario. Neste contexto, 30 persoeiros galegos veñen de solicitar a todos os Estados membros da UE que “voten si ao recoñecemento da lingua galega como oficial da Unión Europea”.
O escrito remitido ás autoridades comunitarias sinala que “a oficialidade do galego en Galiza, recoñecida en 1981, non será plena se non atinxe a todos os ámbitos da nosa vida social, económica e cultural, hoxe condicionada en moitos aspectos pola nosa pertenza a unha Unión Europea que aínda non recoñece plenamente a nosa lingua”.
O presidente da Mesa pola Normalización Lingüística, entidade promotora da iniciativa, Marcos Maceira, afirma a Nós Diario que “é importante que o idioma galego sexa oficial na Unión Europea para que teña consecuencias internas no país e se avance cara a unha oficialidade real”. A este respecto, apunta que “para afrontar o futuro en todos os ámbitos precisamos o apoio e protección que as regulacións europeas dan ás linguas oficiais da Unión”.
Maceira agradece o amplo apoio social á misiva, asinada por 30 persoas referentes de todo o espectro galego. Así, do ámbito institucional conta co apoio das alcaldesas e alcaldes de Compostela, Goretti Sanmartín, da Coruña, Inés Rei, de Lugo, Lara Méndez e de Pontevedra, Miguel Anxo Fernández Lores. Ao tempo, asinan os presidentes das Deputacións da Coruña e Lugo, Valentín Formoso e José Tomé e os voceiros parlamentarios do BNG e do PSdeG, Ana Pontón e Luís Álvarez.
O mundo da cultura, da ciencia e do coñecemento está representado polos reitores das tres universidades públicas galegas, Antonio López, Julio Abalde e Manuel Reigosa. Avalan o escrito o presidente da Real Academia Galega, Víctor Freixanes; o presidente Asociación de Escritoras e Escritores en Lingua Galega, Cesáreo Sánchez, a presidenta da Asociación de actores e actrices da Galiza, Arantza Vilar; o presidente de Galiza Cultura, Xosé Manuel Carril; o voceiro de Vía Galega, Anxo Louzao; o presidente da Mesa pola Normalización Lingüística, Marcos Maceira; a presidenta da Coordinadora de Traballadores e Traballadoras pola Normalización da Lingua, Anxos Sobriño; e a presidenta da confederación de Anpas galegas, Isabel Calvete.
O mundo económico
A esfera económica súmase a esta iniciativa a través dos secretarios xerais da CIG, Paulo Carril, da UXT, José Antonio Gómez e de Comisión Obreiras, Amelia Pérez. Asemade, asinan a carta, Roberto García de Unións Agrarias; Isabel Vilalba do SLG; Xurxo Álvarez da Federación Rural Galega; Roi Cuba da asociación ecoloxista Adega; e Higinio Mougán da Asociación Galega de Cooperativas Agroalimentarias (Agaca).
O PP evita apoiar a oficialidade do galego
Os grandes ausentes no escrito remitido á UE reclamando a oficialidade do galega son os representes institucionais do PP. Malia que os promotores da carta demandaron o apoio aos presidentes das Deputacións de Pontevedra e Ourense, Luis López e Luís Menor, ao rexedor de Ferrol, José Manuel Rei e ao voceiro parlamentario, Alberto Pazos, estes non atenderon a petición, a pesar de confirmar a recepción do convite.
