O presidente do Principado, o socialista Adrián Barbón, afirmou esta terza feira que ninguén vai dicir "desde calquera outra comunidade" o que ten que recoller Asturias no seu Estatuto de Autonomía.
As declaracións de Barbón producíronse poucas horas despois de que a Real Academia Galega (RAG) reclamase a oficialidade do galego en igualdade de condicións que o asturiano no novo Estatuto de Autonomía de Asturias.
Actualmente, o nome recollido na lexislación asturiana para a lingua falada entre os ríos Navia e Eo, na zona fronteiriza coa Galiza, é 'galego-asturiano'. Con todo, a principal asociación cultural do Navia-Eo, Xeira, chegou a denunciar a "intención do Goberno de Asturias de cambiar o nome ao galego-asturiano" por 'eonaviego'.
'Eonaviego'
A protesta de Xeira veu polo uso nos últimos meses polo Principado do termo 'eonaviego' para referirse á a lingua do extremo occidental de Asturias e despois dunha pregunta de Podemos á conselleira de Cultura Berta Piñán, quen respondeu que o uso deste termo se basea nun informe da Academia da Llingua (ALLA), que é o que van usar no dicionario de galego-asturiano que está a preparar a institución ('Dicionario eonaviego').
Ante estas afirmacións, a RAG reclamou o mesmo trato para as dúas linguas propias de Asturias, o galego e o asturiano, e critica, ademais, que se elixa o glotónimo "eonaviego", unha fórmula, recalca, que busca "facer invisíbel a existencia do galego" nas comarcas lindeiras coa Galiza.
A institución remitiu ao presidente do Principado, Adrián Barbón, ao Goberno de Asturias e aos grupos parlamentarios o informe aprobado no seu último pleno ordinario á mantenta da reforma do seu Estatuto de Autonomía.
La reforma del Estatuto de Autonomía se negocia en Asturias de acuerdo al sentir de los grupos políticos, entidades y asociaciones asturianas.
Nadie nos dirá, desde cualquier otra Comunidad y por mucho respeto que les tengamos, lo que tenemos que recoger en nuestro Estatuto.— 🌹 Adrián Barbón 💙💛 (@AdrianBarbon) January 11, 2022![Publicidade 196259]()
A resposta de Barbón chegou a través dun apuntamento en Twitter, onde indicou que esa reforma negóciase en Asturias "de acordo ao sentir dos grupos políticos, entidades e asociacións asturianas".
"Ninguén nos dirá, desde calquera outra comunidade e por moito respecto que lles teñamos, o que temos que recoller no noso Estatuto", sentenciou o presidente.
