chaparrita.- Zapatilla ou chancleta. Tamén se lle daba o nome á acción de dar con ela nas cachas aos nenos.
Exemplo.- “Vouche dar unha chaparrita.”
Lugar de escoita.- O Barbanza.
Fonte.- Constantino Prego.
espenecho (en).- Ten o significado de dicirlle a unha persoa que non leve a cabeza descuberta, que se poña un sombreiro.
Exemplo.- “Non vaias en espenecho.”
Lugar de escoita.- Vilariño (Agolada).
Fonte.- Manuel Cabada Castro.
folete.- Bocha que se forma na roupa engruñada.
Exemplo.- “Non te dás amañado, estira ben o xersei que o levas cheo de foletes.”
Lugar de escoita.- O Morrazo.
Fonte.- Francisca Abalde Omil.
Outros apuntamentos.- Grupo Maré do Morrazo, formado por Salvador Castro Otero, Lucía Durán Paredes, Xosé Manuel González Barreiro, Henrique Harguindey Banet, Xosé Martínez García, Soledad Ríos Santomé, Ramón Rocamonde Gómez e María Emma Tilves Pazos.
patrafolas.- Dise da persoa que viste con roupa dun talle maior que o seu, ou anda descamisado.
Exemplo.- “Aínda es patrafolas! Andas coma Xan da Riola, coa camisa de fóra.”
Lugar de escoita.- Carbeiral - Bardaos (San Sadurniño).
Fonte.- Lino Sanjurjo.
rodillo.- (Ademais de significados rexistrados) Pano de cociña cadrado, de material similar ao das toallas.
Exemplo.- “Despois de lavar a louza, sécaa cun rodillo.”
Lugar de escoita.- Burela.
Fonte.- Mario Ferreira.
Outros apuntamentos.- A fonte puntualiza que o termo non se emprega cando o tecido do pano non é o indicado.