O Salvador amplía un estado de excepción que xa deixou un total de 34.500 detencións

Diante dunha nova extensión do estado de excepción no Salvador, asociacións en defensa dos dereitos humanos denuncian as capturas indiscriminadas.
O presidente do Salvador, Nayib Bukele, é acusado de perpetrar violacións dos dereitos humanos. (Foto: Camilo Freedman / dpa)
photo_camera O presidente do Salvador, Nayib Bukele, é acusado de perpetrar violacións dos dereitos humanos. (Foto: Camilo Freedman / dpa)

A Asemblea Lexislativa do Salvador aprobou nas últimas horas a extensión por segundo mes consecutivo do estado de excepción no Estado centroamericano, que deixou unha cifra superior aos 34.500 arrestos de presuntos pandilleiros desde que 27 de marzo entrou en vigor.

"Ampliamos o réxime de excepción por 30 días máis para continuar capturando estes terroristas que, por anos, encheron de loito á poboación salvadoreña", anunciou a institución lexislativa, na que o partido Novas Ideas do presidente Nayib Bukele, da dereita liberal, ten a maioría.

Varias organizacións sociais reclamaron ao Goberno que a medida sexa deposta, pois o réxime de excepción suspende varias liberdades constitucionais como a de reunión, asociación, inviolabilidade da correspondencia e telecomunicacións, así como o dereito á defensa propia.

Outra reclamación baséase en que a Carta Magna esclarece que a prórroga de 30 días pódese autorizar se as causas do estado de excepción seguen vixentes. Polo contrario, as organizacións defenden que a escalada de asasinatos foi controlada despois do primeiro mes neste réxime.

A lexisladora do partido conservador Imos, Claudia Ortiz, denunciou que o Goberno está a encarcerar xente inocente e acusouno de “axudar a criminais a evadir a xustiza”.

O portavoz da Fronte Farabundo Martí para a Liberación Nacional, situada na á esquerda do espectro político salvadoreño, Jaime Guevara, afirmou que o seu grupo parlamentario non ía apoiar a nova extensión do estado de excepción, "como o fixemos antes e neste terceiro con moita máis razón”. 

Guevara mencionou que hai unha enorme cantidade de persoas que están sendo detidas inxustamente e que hai unha violación aos dereitos humanos porque as capturas ficaron a criterio de soldados e policías.

Protestas dos movementos polos dereitos humanos 

Abraham Abrego, avogado de Cristosal, movemento defensor dos Dereitos Humanos no Salvador, expuxo que non se debería estender o réxime de excepción, xa que a motivación que o xerou foi superada e “non serviu para identificar a responsábeis da alza de homicidios” senón, “xerou loito e dor para centos de familias por casos de detencións arbitrarias inxustas”.

“Para as vítimas de violencia de cuadrillas o réxime de excepción non produciu moitos cambios, seguen desprazándose fuxindo da extorsión e a violencia. O Goberno segue igual sen garantir a súa protección”, apostilou.

Human Rights Watch e a Comisión Interamericana de Dereitos Humanos tamén manifestaron preocupación polo estado de excepción no Salvador.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios