O presidente da Letonia, Edgars Rinkevics, suspendeu por dous meses a entrada en vigor dunha nova lei aprobada a semana pasada que permitirá, por primeira vez, o rexistro de parellas do mesmo sexo.
Rinkevics actuou por imperativo constitucional após 34 membros do Parlamento, ou Saeima, esixiren a suspensión das novas regras mentres se procede a unha recolla de sinaturas para esixir a realización dun referendo sobre o caso.
A lei prevé que o mesmo realizarase se son recollidas no mínimo 155.000 sinaturas en locais especiais designados para ese fin.
A alteración, que permite aos notarios rexistrar dous adultos como parella, independentemente do sexo, foi aprobada na Saeima a 9 de novembro con 53 votos a favor e 43 contra.
Os seus opositores consideran a alteración como unha afronta aos “valores tradicionais” e como un ataque ao modelo tradicional de familia, pois a mesma constitúe un primeiro paso para o casamento entre persoas do mesmo sexo.
A oposición máis intensa xurdiu do partido populista Letonia Primeiro (LPV), cuxa deputada Ramona Petravica afirmou que o próximo paso tras a legalización das unións entre persoas homosexuais sería “homes barbudos vestidos de noiva”.
A petición dirixida ao presidente foi asinada por deputados de todos os partidos da oposición, incluíndo o conservador Lista Unida (As) e o ultra Alianza Nacional (NA), que formaban parte da coalición gobernamental antes da remodelación de setembro, que levou ao Executivo os socialdemócratas Progresistas e a Alianza dos Verdes e Agricultores (ZZS).
Estes dous partidos fan agora parte do goberno dirixido pola primeira ministra Evika Silina, do centrista Nova Unidade (JV).
Rinkevics foi elixido presidente pola Saeima ao final de maio e é o primeiro xefe de Estado da Letonia assumidamente homosexual.
