O planeta elixe rumbo: as chaves das eleccións convocadas en 76 Estados para 2024

Máis de 35% dos Estados do mundo segundos os cálculos do semanario The Economist, nos que viven 4.000 millóns de persoas, teñen previsto citas coas urnas ao longo de 2024, un exercicio no que se porá en xogo o predominio progresista en América Latina ou se determinará o futuro da política portuguesa, coa vista posta tamén nos resultados das eleccións na India, Rusia e os Estados Unidos. O avance da esquerda en Latinoamérica levou a unha relación de dous Gobernos progresistas por cada conservador, o que permitiu a reactivación de entidades como a Comunidade de Estados Latinoamericanos e Caribeños e a Unión de Nacións Suramericanas. A ex alcaldesa de Cidade de México Claudia Sheinbaum aspira a converterse na primeira muller en presidir o país substituíndo no cargo a Andrés Manuel López Obrador, co que comparte militancia no progresista Movemento de Rexeneración Nacional. As enquisas amosan que parte cunha importante vantaxe de cara aos comicios do 2 de xuño, nos que tamén se renovará o Senado e a Cámara de Deputados. Outro dos Estados con Goberno progresista no que se votará é Venezuela, onde decorrerán eleccións presidenciais que aínda non teñen data. O que si está claro é que María Corina Machado encabezará a candidatura da conservadora Plataforma Unitaria Democrática, que está nas mans do Tribunal Supremo logo da súa inhabilitación por corrupción e non xustificar uns fondos durante a súa etapa como lexisladora. No que atinxe ao Partido Socialista Unido de Venezuela, non confirmou aínda se o presidente Nicolás Maduro será o seu candidato. O mundo en guerra: máis dunha cuarta parte dos Estados participan en conflitos armados No Uruguai, as votacións presidenciais e lexislativas están fixadas o 27 de outubro, unha data na que a progresista Fronte Ampla intentará volver ao Executivo logo da vitoria do conservador Luis Lacalle en 2019. A expensas do resultados das súas primarias, as enquisas consolidan a formación como a principal do país, superando 40% de intención de voto nas sondaxes desde hai un ano. As outras convocatorias electorais previstas en América Latina en 2024 serán no Salvador, Panamá e República Dominicana. No primeiro todo indica que o ex presidente de extrema dereita Nayib Bukele -que entrou en excedencia para presentarse a unha reelección prohibida pola Constitución- volverá ser elixido o 4 de febreiro e contará con maioría absoluta no lexislativo Ao norte do continente, e con todo pendente da decisión do Tribunal Supremo arredor de se Donald Trump pode presentarse, todo apunta que o presidente entre 2017 e 2021 será o elixido nas primarias republicanas para enfrontar o demócrata Joe Biden o 5 de novembro. As enquisas brindan unha maior intención de voto a Trump en todos os Estados chave. Asemade, renovarase a Cámara de Representantes e un terzo do Senado. A UE enfronta a ultradereita Xa en Europa, 27 Estados votarán entre o 6 e o 9 de xuño no proceso para a remuda do Parlamento da Unión Europea (UE). As primeiras estimacións demoscópicas apuntan a unha alza da ultradereita. O mesmo escenario debuxan as sondaxes para Portugal, pois o Chega duplicaría o 10 de marzo os seus resultados das lexislativas de 2022 ate superar 15%. O Partido Socialista, que xa definiu como candidato e novo líder ao ex ministro de Infraestruturas Pedro Nuno Santos, e o conservador Partido Social Democrata, estarían a competir pola primeira praza na contorna de 30% dos sufraxios, co que Luís Montenegro, que encabeza esta última formación, podería ser primeiro ministro co apoio da ultradereita, incluso sen precisar da Iniciativa Liberal, que subiría até 7%. Á esquerda, as enquisas detectan un ascenso do Bloco de Esquerda (7%), Livre e Pessoas-Animais-Natureza, con 2,5%, mentres que a Coligação Democrática Unitária, liderada polo Partido Comunista, empeora as súas cifras e estaría superando 3%. Meloni: a extrema dereita populista gobernando As votacións lexislativas estenderanse tamén por Bélxica, Austria, Xeorxia, Croacia ou Belarús, e cara ao final de ano terían que decorrer as presidenciais en Moldova, coa conservadora e pro UE Maia Sandu buscando revalidar mandato fronte ao Partido dos Socialistas, máis achegado a Rusia. Alí, unha semana despois das votacións en Portugal, o presidente Vladimir Putin opta á reelección nas presidenciais para un novo período de seis anos. En África, os comicios máis relevantes aínda non teñen data, mais as últimas eleccións xerais en Suráfrica tiveron lugar en maio de 2019. Nas votacións, o Congreso Nacional Africano do presidente Cyril Ramaphosa loita por manter a maioría absoluta coa que goberna após a fin do apartheid. No continente asiático, o ano comeza coa atención fixada nas eleccións presidenciais e parlamentarias do 13 de xaneiro no territorio taiwanés, após colapsar as negociacións entre o Partido Nacionalista da China e o Partido Popular de Taiwán para lanzar unha candidatura conxunta. Estas dúas formacións están consideradas máis proclives ao diálogo con Beijing. Con todo, a falta de acordo coloca o vicepresidente Lai Ching-te, do Partido Democrático Progresista, máis achegado aos Estados Unidos, como o mellor situado nos comicios. Asia, pendente dos resultados en Paquistán e na India O 8 de febreiro é a poboación paquistaní a chamada a votar para seleccionar unha nova composición da Asemblea Nacional. A principal incógnita é o desempeño nas votacións do Movemento pola Xustiza do ex primeiro ministro Imran Khan, preso no marco dunha persecución do Exército, ao que denunciou por formar parte dun plan estadounidense para impulsar a moción de censura que acabou en 2022 co seu Goberno pola proximidade coa China e Rusia. Aínda que as enquisas publicadas abrían a porta a que a formación obtivese até a metade dos votos, a presión dos militares a favor doutras candidaturas e a imposibilidade de Khan de presentarse poden minar a súa base de apoio. Sete días máis tarde será a quenda de Indonesia. O presidente Joko Widodo xa cumpriu cos dous mandatos que permite a lexislación local, polo que o seu compañeiro no progresista Partido Democrático Indonesio da Loita Ganjar Pranowo tratará de manter a primacía da organización tanto a nivel presidencial como lexislativo. Probabelmente entre abril e maio máis de 940 millóns de indias e indios terán que elixir as e os representantes no Lok Shaba, a Cámara Baixa. O primeiro ministro Narendra Modi chega logo de imporse en tres Estados chave nos comicios estatais de decembro.