Panamá e Suez estrangulan o comercio mundial

Os dous canais artificiais máis importantes do mundo, a canle de Panamá e a de Suez, están nestes momentos moi por baixo da súa capacidade máxima, xerando unha crise nas cadeas de subministración que afecta especialmente aos Estados Unidos e á Unión Europea. Polo canal de Panamá, que une o océano Pacífico co Atlántico, pasa 6% do comercio mundial e case 60% dos contedores que se moven desde Asia á costa leste dos Estados Unidos, e polo de Suez, que leva desde o mar Mediterráneo até o océano Índico por medio do mar Vermello, 12% de todos os intercambios comerciais. Suez concentra 30% do tráfico de contedores global e 40% do comercio entre o continente asiático e o europeo. Cada día cruzan por esta vía máis de un millón de barrís de petróleo, imprescindíbel aínda máis para a UE por mor das sancións aos produtos petrolíferos rusos. No caso panameño a responsábel é a seca que padece o país centroamericano, e no da ruta de Suez os ataques contra buques relacionados con Israel -a pesar de que se produciron operacións contras navíos sen vínculos aparentes co Estado sionista, mais si cos Estados Unidos, por exemplo unha vez que os estadounidenses bombardearon o Iemen- no mar Vermello por parte do movemento hutí, que controla as áreas máis poboadas do territorio iemení. Mentres Washington xa despregou os seus buques de guerra na zona, Bruxelas ultima unha misión naval que se prevé sexa anunciada o 19 de febreiro na xuntanza do Consello de Asuntos Xerais. En decembro, estas situacións estiveron implicadas na caída de 1,3% no comercio mundial, o que para a axencia AP “reflicte que os bens ficaron atrapados nos barcos en lugar de ser descargados nos portos”. Panamá A semana pasada, a Autoridade do Canal de Panamá fixo público que incrementarán a redución de tránsitos pola grave seca que comezou en 2023, após un lustro no que as chuvias se reduciron 20%, rebaixando até 36% os cruces, o que segundo Ricaurte Vásquez, administrador da entidade, custará ao país entre 450 e 640 millóns de euros. Se nun día normal 38 embarcacións utilizaban a ruta, agora o límite será de 24, isto con posterioridade a que foran adoptadas medidas como limitar o calado. Vásquez detallou que a diminución da carga transportada alcanzou 20%. Toda a atención está posta na temporada de chuvias que comeza a finais de abril. Cada un dos tránsitos precisa arredor de 200 millóns de litros de auga procedentes principalmente do lago Gatún, o máis grande do sistema hídrico que permite o funcionamento do canal. Precisamente, de alí procede un 50% da auga potábel que consome o conxunto da poboación panameña. En lugares como Arraiján, cuxa área metropolitana concentra máis de 140.000 persoas á beira da saída da infraestrutura ao Pacífico, os cortes de auga son frecuentes, entre críticas das candidaturas de oposición nos comicios xerais de maio ao Partido Revolucionario Democrático do presidente Laurentino Cortizo. Suez A exipcia Autoridade do Canal de Suez cifrou en 30% a baixada nos tránsitos e de 40% nos ingresos nas dúas primeiras semanas do ano, logo de que sete das dez principais empresas de transporte marítimo suspenderan temporalmente o seu paso polo mar Vermello e o canal, optando por circunnavegar África, o que implica un aumento de 15 días na duración das viaxes, redundando nunha suba do gasto en combustíbel e en salarios, indicou Osama Rabie, que encabezada o organismo. Con estimacións que elevan a 90% a porcentaxe de barcos portacontedores que son usuarios habituais da canle e que se desviaron ao sur de África, o prezo dun contedor estándar enviado desde China a Europa medrou de case 1.400 euros a máis de 5.000. Os arredor de trinta barcos atacados polos hutí, que advertiron que manterán as súas accións até a fin da agresión militar israelí contra o territorio palestino de Gaza, tamén forzaron que o porto israelí de Eilat, no mar Vermello, perdera 85% da súa actividade. O conselleiro delegado de Maersk, Vincent Clerc, afirmou que isto significará “probabelmente interrupcións na cadea de subministración uns meses”. Aínda que o aumento dos custos de transporte repercute en toda a cadea, entre alarmas polo seu impacto na inflación, os atrasos afectaron sobre todo as fábricas de coches. Volvo e Tesla xa anunciaron feches temporais das súas fábricas na Unión Europea pola falta de compoñentes. Até tres semanas de atrasos No sector galego do automóbil estanse a fretar avións para compensar os atrasos nas entregas de até 20 días e prever rupturas na cadea de subministracións pola situación no canal de Suez. Tamén preocupan as materias primas para as empresas metalúrxicas ou da construción, así como os efectos no sector téxtil. Os datos da Administración estatal poñen de manifesto que máis de 4.000 millóns de euros de importacións e exportacións de empresas galegas pasaron por esta ruta no ano 2022.