O Partido Comunista Português (PCP) anunciou na noite da cuarta feira a súa decisión de non asistir á intervención do presidente de Ucraína, Volodimir Zelenski, esta quinta no Asemblea da República de Portugal.
Face à grave situação na Ucrânia e no Leste da Europa, o PCP reafirma a necessidade de serem realizados todos os esforços no sentido da paz e contra a escalada da guerra e que deve ser este objectivo que deve pautar o papel de Portugal e das suas instituições.
— PCP (@pcp_pt) April 20, 2022
+
Para o PCP, o convite a Zelenski "constitúe un acto de instrumentalización dun órgano soberano". Lamentan que a intervención ten por obxectivo alentar a escalada da guerra en Ucraína no canto de apostar por unha "solución negociada do conflito" e pola paz.
Sobre Zelenski, os comunistas portugueses cualifícano como a personificación dun "poder xenófobo e belicista, rodeado e sustentado por forzas de cariz fascista e neonazi".
En concreto, fan referencia a un episodio recente que ocorreu no Parlamento grego. Durante a súa intervención, o dirixente ucraíno deu voz a dous integrantes do grupo neonazi do Batallón Azov, decisión que espertou o malestar de toda a Cámara helena. Naquela sesión, o Partido Comunista grego (KKE) tampouco asistiu á intervención de Zelenski.
Esforzos para a paz
"Ante a grave situación en Ucraína e Europa do Este, o PCP reafirma a necesidade de facer todo o posíbel pola paz e contra a escalada da guerra", asegura na súa conta de Twitter a formación política, que defende que ese ten que ser o obxectivo que "debe guiar o papel de Portugal e as súas institucións".
Os comunistas portugueses "reafirman" a necesidade de iniciativas urxentes e medidas que abran camiño á negociación e á paz", no canto de "dar forza á confrontación, incrementar a guerra e dificultar o cese das hostilidades".
A portavoz parlamentaria do PCP, Paula Santos, afirmou que a súa decisión non é unha mostra de apoio a Rusia, xa que a súa formación é "oposta ás forzas políticas que gobernan a Rusia capitalista e os seus grupos económicos".
Os dous eurodeputados dos comunistas portugueses xa votaran en contra da resolución do Parlamento Europeo que condenaba a guerra en Ucraína, xa que entendían que "daba forza á escalada da confrontación", ao "impor unha visión unilateral" do conflito.
Convite a Zelenski
O presidente de Ucraína foi convidado a intervir na Asemblea de Portugal co voto a favor de todas as formacións políticas que integran o Parlamento, a excepción do propio PCP.
Ademais de Zelenski, na sesión tamén falarán o xefe de Estado, Marcelo Rebelo de Sousa, e o presidente da Asemblea, Augusto Santos Silva.
Precisamente, foron os dous políticos os que propuxeron convidar o dirixente ucraíno para intervir na Cámara lusa, da mesma maneira que xa o fixo noutros países europeos e no Congreso dos Estados Unidos (EUA).