O presidente de Ucraína, Volodimir Zelenski, anunciou na fin de semana a suspensión da actividade de dez partidos da oposición mentres dure a lei marcial, aducindo a escalada da guerra e supostos vencellos dalgúns deles con Rusia.
O principal partido da oposición, a Plataforma de Oposición-Pola Vida, que se sitúa no centro-esquerda e conta con 43 escanos na Rada ucraína, ten suspendida a súa actividade. Xunto a ela tamén fican coa súa actividade ilegalizada as formacións sen representación na Rada: Partido Sharia, Noso, Oposición de Esquerda, Unión de Forzas de Esquerda, Estado, Partido Socialista Progresista de Ucraína, Partido Socialista de Ucraína, Socialistas e Bloque de Vladimir Saldo.
Os partidos con representación na Rada que continúan con actividade son o democristián Patria (26 escanos), o conservador Solidariedade Europea (25 escanos) e o liberal Voz (20 escanos), ademais do partido de Zelenski, Servidor do Pobo (254 escanos), que ten maioría absoluta na Rada.
O presidente ucraíno sinalou que o Ministerio de Xustiza xa recibiu instrucións de tomar de inmediato medidas integrais para prohibir as actividades destes 10 partidos políticos.
"O Consello Nacional de Seguridade e Defensa decidiu, dada a guerra a grande escala e os vencellos dalgunhas estruturas políticas con este Estado [por Rusia], suspender calquera actividade dunha serie de partidos políticos durante o período da lei marcial", explicou Zelenski nun vídeo difundido por canles do Goberno.
O líder ucraíno advertiu aos partidos opositores, a maioría ao lado esquerdo do espectro político, de que "calquera actividade encamiñada a escindirse ou colaborar non terá éxito" e recibirá "unha resposta difícil". Seguindo coa xustificación da súa decisión, acusou de "pór as súas propias ambicións, o seu propio partido ou carreira por enriba dos intereses do Estado, os intereses do pobo" aos líderes dos partidos ilegalizados.
A decisión de paralizar a actividade de partidos opositores contrasta coa permisividade con organizacións como o batallón Azov, dependente da Garda Nacional e do Ministerio do Interior de Ucraína e que está acusado de ter unha ideoloxía de ultradereita e xenófoba.
En 2015 ilegalizáronse os partidos comunistas
A decisión de Zelenski non supón a primeira ilegalización de partidos en Ucraína. No ano 2015, o Goberno ucraíno prohibiu aos partidos comunistas presentarse ás eleccións nunha decisión que xustificou alegando que teñen unha ideoloxía que defende "a tortura da poboación ucraína e os asasinatos masivos".
Aquela ilegalización afectou a tres partidos: o Partido Comunista de Ucraína, o Partido Comunista de Ucraína Renovado e ao Partido Comunista dos Traballadores e Campesiños de Ucraína.
