Polo menos dez persoas morreron esta sexta feira por mor dun bombardeo executado polo Exército de Israel contra un cemiterio na localidade de Beit Lahia, situada no norte da Faixa de Gaza, no marco da ofensiva desatada desde o 7 de outubro.
Segundo as informacións recollidas pola axencia palestina de noticias WAFA, o ataque alcanzou a un grupo de traballadores do cemiterio, sen que o Exército de Israel se pronunciase polo momento sobre estas informacións.
Máis de 9.000 asasinatos
Israel lanzou unha ofensiva militar que inclúe desde hai días operacións terrestres mentres o número de falecidas palestinas xa pasa das 9.000.
O portavoz do Ministerio de Sanidade palestino, Ashraf al Qidra, sinalou que até o momento confirmouse a morte de 9.061 persoas, mentres que preto de 32.000 resultaron feridas, tal e como recolleu a cadea de televisión palestina Palestine Today.
Horas antes, o propio Al Qidra cifrara en mil os mortos, feridos e desaparecidos por mor dos dous bombardeos executados polo Exército de Israel contra o campamento de refuxiados de Yabalia, situado no norte da Faixa e o máis grande do enclave, desde a xornada da terza feira, aínda que por agora non hai cifras exactas sobre falecidos, segundo un comunicado publicado polo ministerio a través da súa páxina na rede social Facebook.
