A filla do filósofo ruso Alexander Dugin, Darya Dugina, faleceu este sábado cando o automóbil en que viaxaba estourou na rexión de Moscova, informou a axencia estatal de noticias rusa TASS.
Dugina estaba a conducir o vehículo cando este, de súpeto, incendiouse. "Estaba completamente en chamas, perdeu o control porque estaba a conducir a gran velocidade e voou á beira oposta da estrada", asegurou Andrei Krasnov, líder do movemento Russky Gorizont e coñecido da familia.
Krasnov declarou a TASS que coñecía persoalmente Dugina e que o coche en que viaxaba pertencía a seu pai.
"Segundo teño entendido, o obxectivo era Alexander Gelievich Dugin directamente, ou talvez os dous", indicou á axencia rusa.
"O cerebro de Putin"
Alexander Dugin, líder do Movemento Euroasiático, está considerado como "próximo" ao presidente ruso, Vladimir Putin. A Dugin atribúeselle ser o "guía espiritual" da invasión rusa de Ucraína e con frecuencia é descrito como o "cerebro de Putin".
En 2015 foi sancionado por EUA por presunta participación na anexión rusa de Crimea. A súa filla, Dugina, naceu en 1992 e estudou Filosofía na Universidade estatal de Moscova, segundo TASS.
A principios deste ano, as autoridades estadounidenses e británicas sancionárona por "contribuír á desinformación sobre a guerra de Ucraína".
![Sira Rego é ministra con Sumar. [Imaxe: Alberto Ortega / Europa Press]](/asset/zoomcrop,480,270,center,center/media/nosdiario/images/2024/05/01/2024050122045973661.jpg)
