Os Estados da Celac rexeitan que a guerra en Ucraína centre o cumio coa UE

O s próximos 17 e 18 de xullo decorrerá en Bruxelas, Bélxica, o III Cumio de Xefes de Estado e de Goberno da Unión Europea (UE) e a Comunidade de Estados Latinoamericanos e Caribeños (Celac). A preparación da declaración da cimeira xerou algúns inconvenientes entre ambas as partes, posto que os Estados da Celac (composta por 33 Estados da rexión) rexeitan unha axenda centrada en Ucraína, como propuxo a delegación da UE. O mes pasado, a UE enviou unha proposta para esa declaración na que incluía varios parágrafos sobre o apoio expreso a Ucraína, facendo referencia a resolucións da Asemblea Xeral da Organización das Nacións Unidas (ONU), reportou Euractiv. "O texto sobre Ucraína foi moi equilibrado [...] Non hai nada especial no que lles enviamos", defenderon diplomáticos da UE. Con todo, a principios de xullo a Celac mandou unha contraproposta, na que, no seu lugar, defenden que a declaración que se aprobará durante ese cumio se refira a que ambos os bloques avogarán por "solucións diplomáticas serias e construtivas ao conflito actual en Europa". A cimeira da Celac marca unha nova era na integración latinoamericana Engaden que esa solución sexa "por medios pacíficos", que garanta a soberanía e a seguridade de todos os Estados, así como "a paz rexional e internacional e a estabilidade". Porén, a resposta non gustou no seo da UE, "borraron todo sobre Ucraína", queixouse outro diplomático do bloque comunitario ao respecto da contraproposta da Celac. Ademais da declaración, outro factor que causaría molestia na Celac foi a incerteza sobre a asistencia do mandatario de Ucraína, Volodimir Zelenski, á cimeira, por invitación do presidente do Goberno de España, Pedro Sánchez. "El [Pedro Sánchez] convidoume, mais algúns líderes de Latinoamérica bloquearon esa invitación", recoñeceu Zelenski a finais de xuño. "Reparacións" Ademais, na contraproposta de borrador presentada pola Celac, os Estados de Latinoamérica e o Caribe piden aos da UE "reparacións" polos danos causados pola ocupación colonial. Unasul e Celac no novo cenário geopolítico "Recoñecemos e lamentamos profundamente o sufrimento incalculábel inflixido a millóns de homes, mulleres e nenos como resultado da trata transatlántica de escravos africanos", di a contraproposta da Celac. No texto engádese o recoñecemento "da necesidade de que se tomen medidas apropiadas para restaurar a dignidade das vítimas [da trata transatlántica de escravos africanos], incluídas reparacións e compensacións" para axudar a sandar a memoria colectiva e reverter os legados do subdesenvolvemento. Ademais disto, no documento faise referencia a cuestións de saúde, educación, desenvolvemento cultural e seguridade alimentaria. Acordo UE-Mercosur O texto engade que ambas as partes "esperan a futura sinatura e aprobación" do acordo entre a UE e Mercosur (o Brasil, a Arxentina, o Uruguai e Paraguai) e tamén inclúe a proposta de que a transición a un sistema económico máis sostíbel debe "ter en conta as circunstancias, os plans e as políticas estatais". O Brasil volveu este ano á Celac, despois de que Jair Bolsonaro saíra en 2020 A posición do Brasil é moi importante para as posibilidades de acordo entre a UE e Mercosur. Neste sentido, o presidente brasileiro e actual máximo representante do bloque económico suramericano, Luiz Inácio Lula da Silva, confirmou esta semana tras manter unha conversa telefónica co presidente do Goberno español e de quenda do Consello da UE, Pedro Sánchez, que asistirá á cimeira entre o bloque comunitario e a Celac. Mercosur culpa a UE de frear un potencial tratado comercial coas súas imposicións Así o fixo o mandatario brasileiro, que liderou o retorno do Brasil á participación na Celac en xaneiro, despois de que de o anterior presidente, Jair Bolsonaro, abandonase a participación na organización en 2020. Lula e Sánchez tamén abordaron o estado das negociacións entre o Mercosur e a UE despois de que o líder do Brasil defendera a posibilidade de chegar a un acordo que resulte beneficioso para ambas as partes agora que o Brasil e o Estado español ocupan a Presidencia de cada un destes bloques internacionais. Neste sentido, Lula deu a Sánchez os parabéns por asumir a Presidencia do Consello da UE. Até ese momento, o mandatario do Brasil non deixara claro se acudiría ao cumio, que foi visto polas partes como unha oportunidade de acelerar as conversas para un posíbel acordo comercial entre a UE e o Mercosur. Previamente, Lula cualificou de "inaceptábel" a última proposta do bloque comunitario e avogou por fechar un acordo "de compañeiros" no que ambos os bloques se comporten como socios estratéxicos, sen imposicións. Mercosur culpa a UE de imposibilitar un acordo por ter "actitudes proteccionistas", tratando de impor cláusulas unilaterais e sancións por incumprimento de especial relevancia no sector alimentario, clave nas exportacións do bloque suramericano. Pola contra, Estados da UE como é o caso de Francia, destacan que é necesario asegurar que Mercosur respecte as condicións ambientais, sanitarias e laborais exixidas no bloque comunitario para non xerar un "dumping" que faga que os produtos da UE deixen de ser competitivos. O Brasil avanza no seu plan de recuperación do Amazonas O control sobre o respecto do medio ambiente no Mercosur é o principal argumento de Francia para impor cláusulas ambientais e sancións por incumprimento no acordo comercial entre a UE e este bloque. Porén, a primeira economía da organización suramericana, o Brasil, avanza na materia, segundo afirmou o seu Executivo. A área amazónica baixo alerta de deforestación caeu 33,6% O Ministerio de Medio Ambiente e Cambio Climático do Brasil anunciou esta sexta feira que, despois de cinco anos consecutivos de resultados negativos, a área baixo alerta de deforestación no Amazonas caeu 33,6% no primeiro semestre deste ano. A UE defende o glisofato Pola contra, as orientacións ambientais da UE no eido agrícola están a ser postas en dúbida por numerosas entidades ecoloxistas. A Autoridade Europea de Seguridade Alimentaria (EFSA) afirmou esta sexta feira que o uso do herbicida glifosato é seguro para a agricultura e non cumpre os criterios científicos para ser clasificado como substancia canceríxena, mutáxena ou tóxica para a reprodución. Porén, organizacións ecoloxistas e científicas criticaron esta decisión. Por exemplo, o grupo de investigación sen fins de lucro Corporate Europe Observatory cualificouna como "chocante" e unha "labazada para a cidadanía".