O coordinador de EH Bildu, Arnaldo Otegi, non tería previsto, en principio, presentarse como candidato a lehendakari para as próximas eleccións vascas, aínda que está á espera de que o que decida respecto diso a dirección da formación abertzale, que se reunirá esta segunda feira para abordar esta cuestión. Con todo, Otegi si volverá a postularse a liderar a coalición no seu próximo congreso.
Así o deu a entender o líder de EH Bildu nesta última semana, en concreto o pasado día 20, cando afirmou nunha entrevista radiofónica que xa adoptara unha decisión sobre presentarse ou non a aspirante a lehendakari, baseada en "factores familiares".
"Levo moitos anos militando e iso supón tamén un desgaste en certa medida para a miña familia, pero tamén teño clara unha cousa, e é que eu non lle podo exixir a ninguén responsabilidade sen asumir as miñas", engadiu.
Arnaldo Otegi afirmou que a reflexión que realizou comunicaraa esta segunda feira na reunión da Mesa Política da formación nacionalista. "Eu expoñerei cales son os meus puntos de vista, logo terá que ser a xente a que diga se os acepta ou non, se os comparte ou non", apuntou.
Con todo, non quixo descartar de todo que poida ser candidato: "se o teño que ser, sereino". En todo caso, subliñou que necesita facer "unha reflexión sincera coa xente", e destacou que a "gran vantaxe" de EH Bildu é que ten "moito banco". "Bastante mellores ca min", apostilou.
Posíbeis aspirantes
Este mesmo sábado, a portavoz de EH Bildu no Congreso, Mertxe Aizpurua, tamén se referiu aos comicios ao Parlamento Vasco de 2024, para afirmar que o coordinador xeral de EH Bildu, Arnaldo Otegi, sería "un perfecto" candidato a lehendakari, pero apuntou que tamén hai outras persoas dentro da organización política que o poden ser.
De momento, soaron como posíbeis aspirantes a Lehendakaritza as parlamentarias Oihana Etxebarrieta e Nerea Kortajarena. A propia Aizpurua estaría tamén nas quinielas. Coa reunión desta segunda, EH Bildu porá en marcha o seu proceso electoral interno para a designación de candidaturas, logo de que esta mesma fin de semana o PNV anunciara tamén unha renovación na súa cabeza de cartel: Urkullu tampouco será candidato a lehendakari.