Unha petición conxunta entre Bloque Nacionalista Galego (BNG), EH Bildu e Esquerra Republicana de Catalunya (ERC) rexistrada hoxe no Congreso español reclama crear unha comisión de investigación sobre a “espionaxe e intromisión á privacidade e intimidade” cos programas Pegasus e Candiru contra “líderes políticos [na súa meirande parte do independentismo catalán], activistas, avogados, xornalistas, institucións e os seus familiares e achegados”.
Todo isto cando Pedro Sánchez (PSOE) xa estaba á fronte do Gabinete español. Até catro presidentes ou ex presidentes catalás foron espiados, así como o líder da forza vasca, Arnaldo Otegi.
Pactos co PSOE
A creación desta comisión formaba parte do pacto PSOE-ERC para que Francina Armengol, da formación estatal, se convertera en presidenta da Cámara Baixa, e chegaría após aprobar a Mesa do Congreso a admisión a trámite da proposta de Junts e o Partido Nacionalista Vasco (PNV) para impulsar dúas comisións de investigación.
Unha delas sobre os atentados xihadistas en Catalunya en 2017 e outra para analizar a serie de actuacións encubertas do Executivo de Mariano Raxoi (2011-2018) para presuntamente espiar políticos independentistas cataláns e crear probas falsas contra eles. As dúas foron acordadas entre o PSOE e Junts.
Todo apunta ao Estado español
A proposta das forzas nacionalistas progresistas insta a depurar responsabilidades e apunta directamente cara ao Estado español, explicando que o software israelí Pegasus “só se vende a forzas da orde e axencias de Intelixencia”.
Asemade, exixe a Madrid que leve a cabo “medidas de resarcimento a todos aqueles afectados polas investigacións ilegais”.
