A Mesa do Congreso autoriza a tramitación da Lei de amnistía mentres a AN pide investigar Puigdemont por terrorismo

Logo de que fora emitido o informe do equipo xurídico do Congreso, que avala a constitucionalidade do proxecto de lei orgánica de amnistía, a Mesa da Cámara Baixa española avalou hoxe o comezo da tramitación parlamentaria da norma cos votos favorábeis de PSOE e Sumar, mentres que o Partido Popular (PP) negouse a cualificar a admisión do texto, unha das exixencias das forzas catalás para apoiar a investidura de Pedro Sánchez (PSOE). Ao tempo, a Mesa aceptou a tramitación pola vía de urxencia, como demandaba a proposta rexistrada en solitario polo PSOE, o que permitirá reducir os prazos do proceso lexislativo á metade. Agora é a quenda da Xunta de Portavoces dos grupos parlamentarios, que terán que pór data na súa reunión da quinta feira para a toma en consideración do proxecto. Entre o paso da amnistía por unha das comisións do Congreso -que aínda non se constituíron- e a votación final no Pleno, o PSOE confía en que o Hemiciclo aprobe a norma en decembro, cando pasará ao Senado, onde se prevé que o PP, que conta con maioría absoluta no órgano, atrase dous meses –o máximo aceptado pola Constitución– a súa tramitación, tras aprobar a toda présa unha reforma no regulamento para negarse a aceptar a tramitación de urxencia de calquera proposición, unha decisión que, en última instancia, agora fica nas mans da Mesa do Senado. Posto que no Congreso non hai sesións en xaneiro, a aprobación definitiva da amnistía podería estenderse a febreiro ou marzo. Aínda non hai datos finais das persoas que se verán beneficiadas pola amnistía a independentistas catalás represaliadas e a policías que trataron de evitar con violencia as votacións no referendo de autodeterminación de 2017 en Catalunya. Mentres que Òmnium Cultural cifrou en 4.400 as persoas represaliadas, e en 1.432 as que xa foron condenadas, xulgadas ou investigadas, o PSOE insistiu en que serían 309 persoas independentistas as que entrarían na amnistía, así como 73 policías. DOCUMENTO | Así é a Lei de amnistía: dende os CDR e o Tsunami até os antidisturbios do 1-O A organización antirrepresiva Alerta Solidària, vinculada á esquerda independentista catalá, sostivo que, deixando fóra cargos políticos, de confianza e funcionarios, terían que beneficiarse 438 persoas con causas en investigación, á espera de xuízo ou sentenza e xa condenadas por participar en protestas independentistas. O voceiro da entidade, Martí Mayoral, explicou que a “cifra do PSOE era interesada, para intentar minimizar o impacto da posíbel amnistía de cara a un público propio”. Na reunión da Mesa do Congreso, o PP reclamou recusar Fernando Galindo, letrado maior da Cámara, polo informe favorábel á tramitación, o que rexeitaron PSOE e Sumar, e admitiuse a trámite a creación dunha comisión de investigación sobre os atentados xihadistas de 2017 en Catalunya e doutra sobre a espionaxe a políticos cataláns, pactadas co PSOE por Esquerra Republicana de Catalunya (ERC) e Junts. Manifestacións e ofensiva xudicial Ademais, o presidente do PP, Alberto Núñez Feixoo, fixo público que convocarán unha nova rolda de protestas contra a norma os primeiros días de decembro para “defender a Constitución española”. O 6 de decembro fanse 45 anos do referendo sobre a Carta Magna, no que a Galiza foi o segundo territorio cunha menor participación -50,2%-, sendo superada só por Euskadi con 44,7%. Tamén adiantou que tratarán de bloquear a amnistía por medio da súa maioría no Senado e as comunidades autónomas baixo o seu control. O PP xa fixera un chamamento a participar en convocatorias contra a amnistía o 12 de novembro, ao que hai que engadir unha protesta en Madrid o pasado sábado organizada por distintas asociacións, coa presenza de Vox, e case tres semanas de mobilizacións, cun peso maior da extrema dereita, diante da sede do PSOE na capital española. No marco da ofensiva contra a amnistía do sistema xudicial español, Manuel García-Castellón, un xuíz vinculado ao PP que dirixe o Xulgado de Instrución 6 da Audiencia Nacional, solicitou hoxe ao Tribunal Supremo que investigue por terrorismo o ex presidente catalán Carles Puigdemont, a secretaria xeral de ERC Marta Rovira e outras dez persoas, na causa pola mobilización no aeroporto Josep Tarradellas Barcelona-El Prat de Tsunami Democràtic en 2019, en resposta ás sentenzas de prisión contra os membros do Executivo catalán que non marcharon ao exilio. Para intentar evitar que os imputados entrasen na amnistía, o maxistrado incluso tratou de vincular a morte por infarto dun pasaxeiro do aeroporto coas protestas, algo que nunca fixeran as investigacións da Policía catalá. En paralelo, a Sala do Penal da Audiencia abriu un expediente gobernativo a García-Castellón por rexeitar a proposta de recusación contra el mesmo efectuada polo empresario Oriol Soler, imputado no caso, indicando que investigará a solicitude e lembrando que é este organismo o que ten que decidir nesas situacións. Á vez, o Tribunal Supremo emitiu o seu veredicto na denuncia contra a ex fiscal xeral e ex ministra de Xustiza polo PSOE Dolores Delgado, subliñando que houbo “desviación de poder” na decisión do actual líder do Ministerio Público e sucesor de Delgado, Álvaro García Ortiz, de ascendela a fiscal da Sala do Militar. Podemos critica Sánchez no traspaso de carteiras Irene Montero pide á súa sucesora en Igualdade "valentía" para "incomodar os amigos de 40 e 50 anos" de Pedro Sánchez Durante a transferencia de poder no Ministerio de Igualdade entre Irene Montero (Podemos) e Ana Redondo (PSOE), a dirixente de Podemos denunciou que Pedro Sánchez “bótanos deste Goberno” por “pór as institucións ao servizo do avance dos dereitos feministas”, e Ione Belarra, ex titular de Dereitos Sociais e líder da formación, acusou a vicepresidenta segunda, Yolanda Díaz, de excluílas para impulsar unha “esquerda” subordinada ao PSOE. Podemos confirmou que actuarán de forma autónoma no grupo parlamentario de Sumar. Despois de prometer os seus novos cargos, cada ministra e ministro foi tomando posesión da carteira. Félix Bolaños, de Xustiza e Presidencia, comprometeuse co diálogo para fomentar a convivencia e Nadia Calviño, vicepresidenta primeira e titular de Economía, recalcou a importancia de integrar Comercio no seu ámbito de actuación. Por Sumar, Díaz asumiu Traballo adiantando unha reforma do subsidio de desemprego e Mónica García, de Sanidade, defendeu o valor do servizo público de saúde.