É unha das consecuencias da crise. Quizás non sexa a máis impactante a primeira vista ante a enxurrada de dramas como o desemprego, despexos... E pode parecer que non é a máis dura. Ter que pedir axuda a amizades e familiares para poder chegar a final de mes.
Segundo a recente enquisa do Instituto Galego de Estatística (IGE) do primeiro trimestre de 2013 perto do dez por cen das familias galegas teñen que botar man desta vía para poder 'saír para adiante': pagar facturas, comprar comida, facer fronte a hipoteca, cumprir cos custos do día a día...
Son milleiros e milleiros de fogares na Galiza. Os cálculos apuntan a que por volta de noventa ou noventa e cinco mil.
![Publicidade 196050]()
En aumento
De feito, e segundo os propios datos do IGE, as familias nesta situación aumentaron nun 100% nestes tres anos de crise aguda. Se no primeiro trimestre de 2013 era un 5 por cento os fogares galegos que tiñan que optar por esta vía; nos tres primeiros meses do presente exercicio, esa porcentaxe ronda o 10%.
Aliás, e segundo o informe dese organismo autonómico, este 2013 está marcado porque cada vez máis fogares están 'coa auga ao pescozo': o 18% das familias chegan a final de mes con moita dificultade; e un 46% con dificultade.
