O tecido empresarial galego perde peso de forma continua: o número de empresas con persoal contratado caeu 8% desde 2008

Exceso de carga burocrática, falta de financiamento, escaseza de persoal cualificado e dificultade de acceder a axudas e subvencións son os principais factores limitadores do crecemento das empresas galegas, segundo se desprende do informe Tecido empresarial galego e dinámica empresarial. Análise comparada, presentado esta cuarta feira polo Consello Económico e Social da Galiza (CES) en Vigo. Nestas circunstancias, o peso das empresas galegas con persoal contratado sobre as do conxunto do Estado descendeu de forma continua desde a crise económica de 2008, coñecida como a Gran Recesión. Así, mentres que as firmas galegas con persoal contratado supuñan 6,57% das estatais ese ano, a mingua levou esta porcentaxe até 6,06% en 2022. Así o recollen os datos do informe realizado polos académicos Santiago Lago Peñas, José Franciso Armesto Pina, Alejandro Domínguez Lamela e Patricio Sánchez Fernández, que destacan que "comparado co inicio da crise financeira de 2008, a Galiza conta con case 8% menos de compañías [con persoal contratado], situándose a destrución empresarial motivada pola pandemia en 2,1%". Por contra, segundo sinalan, o Estado "conta cun nivel empresarial similar ao de 2008 e 0,8% inferior en comparanza co ano 2019". Rueda fecha a porta á petición do CES dunha empresa de enerxía "pública" Contratación na empresa En 2022, 96,31% do tecido empresarial galego estaba composto por microempresas, mentres que 3,14% eran pequenas compañías, 0,47% medianas e tan só 0,8% tiñan a cualificación de grandes, unha estrutura empresarial que motiva o alto nivel de firmas sen persoas contratadas. "Tras a forte caída do número de empresas con traballadores inscritos na Seguridade Social no ano 2020 por mor do impacto da Covid (-3,3%, porcentaxe tan só inferior á rexistrada en 2012), a reactivación da economía en 2021 tradúcese nunha medra interanual do número de empresas de 2,3%, sendo esta taxa de variación cinco décimas inferior á rexistrada no conxunto do Estado", sinala o informe. 96,31% do tecido empresarial está composto por microempresas "A freada experimentada en 2022 incide nunha caída do número de empresas con persoal tanto na Galiza como no Estado, sendo novamente máis intensa no caso galego", prosegue. Neste contexto, incide o estudo, "a 31 de decembro de 2022, o número de empresas con traballadores inscritos na Seguridade Social na Galiza ascende a 80.588, o que supón unha destrución de 778 empresas en relación á mesma data do ano anterior". "Tendo en conta a evolución ao longo dos últimos anos, cómpre indicar en primeiro lugar o peor comportamento do tecido empresarial galego en comparación co conxunto do Estado", aclaran os académicos no documento. Maior impacto da Covid A finais de 2022 hai na Galiza 1.697 empresas con persoal menos que ao inicio da pandemia, o que supón 2,1% menos (-0,8% no Estado). En relación ao rexistrado na mesma data de 2008, o número destas empresas inscritas reduciuse en 6.884 empresas, 7,9% menos, o que contrasta co acontecido a nivel estatal, onde o número destas firmas permanece practicamente estábel, explica o estudo do CES. A Galiza foi a autonomía co terceiro peor impacto negativo da crise da Covid Uns datos que indican, defenden os académicos, que a Galiza "sitúase como a terceira autonomía [do Estado] con maior impacto negativo da crise orixinada pola Covid, tan só superada por Castela e León e A Rioxa". Ao analizar a evolución nas diferentes autonomías entre os anos 2008 e 2022, a Galiza "é a terceira cunha maior perda de empresas [con persoal contratado] en termos absolutos, por detrás de Catalunya e Castela e León. En termos porcentuais, a redución de 7,9% na Galiza sitúaa como a sexta con maior descenso tras Asturias, Castela e León, Aragón, Cantabria e Euskadi", prosegue o estudo. "Necesitamos que nazan moitas empresas e que se desenvolvan", subliñou Lago Peñas. Segundo dixo, Galiza está por baixo do Estado e da Unión Europea (UE) no seu ratio de grandes firmas, o que incide no emprego. O Supremo sentenza que os períodos de ERTE na Covid non contan para a percepción do paro En relación ás conclusións do informe, Patricio Sánchez explicou que o CES recolleu máis de 30 propostas a levar a cabo co obxectivo de permitir ás empresas galegas desenvolverse máis e aumentar de tamaño, podendo así crear máis emprego. Entre estas, atópase a necesidade de simplificar o sistema tributario e revisar aquelas cuestións que poñen o acento no tamaño empresarial, fomentar a participación de axentes de financiamento como o Instituto Galego de Promoción Económica (Igape), impulsar o gasto en I+D+i no ámbito privado ou analizar os perfís profesionais que serán necesarios nun futuro próximo para promover programas de formación. A modernización e a racionalización do conxunto das Administracións Públicas é outra das propostas do CES para tratar de permitir un mellor desenvolvemento das empresas galegas, así como un incremento do investimento e unha mellora da coordinación entre Administracións. Para concluír, o presidente do CES, Manuel Pérez Álvarez, destacou a importancia destes estudos, que teñen como obxectivo favorecer o desenvolvemento económico e social da Galiza. Unha perda de compañías máis pronunciada no interior do país Segundo explica o informe presentado esta cuarta feira polo CES, o descenso do número de empresas que tiñan persoal contratado en 2022 con respecto ao ano anterior deuse tanto na Galiza (-1%) como no Estado (-0,2%).Unha mingua que foi unha constante na totalidade do territorio galego. Os sindicatos rexeitan saídas forzosas no ERE de Telefónica Porén, as taxas de destrución empresarial máis acusadas déronse no interior da Galiza. Desta forma, nas comarcas do nordeste do país rexistrouse a caída do número de empresas con persoal contratado máis significativa, tanto en termos absolutos como relativos, (1,9% e 215 firmas). Mentres que nas comarcas do sueste o descenso foi de 1,2% e un total de 110 compañías. As empresas con persoal contratado descenderon en 2022 na Galiza en todos os sectores da economía, sendo o primario o que obtivo o peor dato (-2,6%), seguido do industrial (-1,5%), da construción (-1,1%) e do sector dos servizos (-0,7%). Dinámica empresarial No que á dinámica empresarial se refire, en 2022 constituíronse un total de 14,1 sociedades por cada 10.000 habitantes fronte ás 20,8 sociedades no conxunto do Estado, o que supón o diferencial máis elevado dende o inicio da crise económica de 2008 tras o rexistrado en 2021.