Os recortes en servizos e a incorporación, subida, ou adianto do cobro de taxas, marcan estes plans de axuste: o concello pontevedrés de Agolada, por exemplo, toma medidas drásticas, ao pechar a biblioteca, a Casa da Cultura, e unha das piscinas municipais, ademais de suprimir un emprego de socorrista e os do programa de axuda no fogar, e recortar máis gastos de persoal (elimina a dedicación exclusiva do concelleiro de Obras e suprime a praza de auxiliar administrativo “secretario de alcalde”).
O concello da Lama, pola súa banda, aprobou o plan (coa abstención do PSOE) polo que aforrará o 30% en iluminación pública. O alcalde confía en poder amortizar a débeda en cinco anos.
En Coristanco, co voto en contra do PSOE e a abstención de TeGa, o goberno local esfórzase nas medidas recadatorias (o plan anterior non fora aprobado porque o aforro neto non era abondo): sóbese o IBI a0,10 e 0,30 para os inmobles rústicos e urbanos, respectivamente, o imposto de circulación, o gravame sobre a construción e a taxa de recollida de lixos.
Tamén recortarán subvencións a eventos deportivos e culturais e o apoio a festas parroquiais, e delega na Xunta os custos do centro de saúde. Prevese así incrementar o aforro anual dos 250.000 euros, previstos no primeiro plan de axuste, a 430.000 euros.
O Concello de Frades sobe tamén as taxas: neste ano xa aumentou a do lixo e o IBI, e en diante farao coas de ocupación e de circulación. Os recortes faranse en persoal: reducirá os contratos do plan de cooperación financiados pola Xunta.
O Concello ourensán dos Blancos, cuxo alcalde propuxera un ERE e ao que o Ministerio denegara o plan que propuxo, non enviou ningún documento novo, afirmando que “non hai máis” onde recortar.
