Así é o verme 'Mythimna', a nova praga que estraga os prados galegos

A finais de agosto comezaron a saltar as primeiras voces de alarma na comarca da Mariña e noutras zonas como Vimianzo (Terra de Soneira) ou Muxía (Fisterra). Poucos días despois o verme arrasaba a colleita de millo en Santa Comba (Xallas), excelente anos atrás. Nese momento houbo xa concellos como Trabada ou Silleda que avisaron a Consellaría do Medio Rural por un problema que mesmo se estaba achegando ás vivendas. A situación máis complicada vívese no agro, segundo explica a Nós Diario o enxeñeiro agrónomo Fernando Núñez Mourelle, “hai moita xente que despois do millo sementou os prados, naceu a herba e ao momento o verme xa a come. Só deixan as malas herbas”. Desta volta non hai que ir lonxe para atopar a orixe do problema, “veñen de aquí, é unha praga que temos desde hai moitos anos, é orixinaria de Europa, neste casos non é americana, é europea”. Nesta época tería que facer máis frío do que vai, “vimos dun inverno que tampouco foi moi frío e toda esa cantidade de vermes que normalmente morren coas xeadas este ano non morreron, tiveron un clima propicio para criar, para multiplicarse máis, e por iso nos atopamos cunha poboación moito máis grande debido ao clima”, explica Mourelle. Segundo os expertos, estes vermes comezaron estragando o millo nalgúns concellos e agora están centrados nos prados. A colleita de millo forraxeiro desborda os silos e a Galiza estréase na exportación A 'Mythimna' en cifras A Consellería do Medio Rural habilitou un número de teléfono para alertas, o 981 544 722. Nós Diario pediu a este departamento información sobre o número de chamadas recibidas, as zonas afectadas e os protocolos e instrucións que achegan. Até o de agora, este xornal non tivo datos algúns da Consellaría de José González. O certo é que como non afecta os animais nin as persoas, Medio Rural non considera este problema unha praga, polo que o único que fai é dar recomendacións aos afectados. Desde esta Consellería limitáronse a explicar a Nós Diario que darán “pautas, asesoramento e información aos interesados”. Medio Rural comezou a semana pasada unha xeira de charlas por distintos puntos do país a respecto desta problemática. Nelas, o xefe de Servizo de Sanidade e Produción Vexetal, Víctor Novo, explicou en Carballo e Vimianzo, repartiu follas divulgativas para combater a presenza destes vermes, onde Medio Rural explica que os afectados “poden utilizar os produtos fitosanitarios autorizados no Rexistro de Produtos Fitosanitarios do Ministerio de Agricultura. "Deben priorizarse, sempre que sexa posíbel, métodos de control non químico (culturais, biolóxicos etc.), respectando así a Xestión Integrada de Pragas”, sinalan. O único produto para combater a praga Segundo explica o enxeñeiro agrónomo Núñez Mourelle, a día de hoxe só hai un produto autorizado para usar nos pastos. A materia activa dese produto, a deltometrina a 2,5%, úsana moitas marcas no mercado “pero só hai unha autorizada para controlar estas pragas, e agora mesmo está esgotado o produto Decis de Bayer”. Tampouco este remedio contra os vermes é proporcionado pola Xunta, así que as propietarias e os propietarios que o atopen teñen que desembolsar 50 euros por un litro de Decis, cunha capacidade para tratar unhas 4 hectáreas afectadas. Unha vez limpo de vermes, ás persoas afectadas só lles queda volver sementar de herba os prados, co custo que supón para as economías agrícolas e o problema engadido do atraso nos pastos e os inconvenientes para os gandos en pastoreo. Nas vilas e cidades a solución pasa pola mesma fórmula, conseguir o produto esgotado para tratar as pragas ou ben agardar a que empece a xear e facer frío. O dano está feito, propietarios de terras que fan rotación millo-herba e os prados permanentes teñen a maior parte da herba comida. Expertos consideran que o verme “solta algunha substancia que non deixa rebrotar, porque as zonas afectadas non están rebrotando, así que hai que volver sementar”. O custo engadido nestes casos suporá entre 150 e 200 euros por resementar cada hectárea afectada. Que é a flavescencia dourada? Eis as chaves da praga que pon en risco a produción de uva na Galiza A produción en ecolóxico No caso dos que están producindo en ecolóxico o problema é maior. Non hai produtos indicados para controlar esta praga que poidan usarse nestes terreos. Produtores en ecolóxico denuncian a “indefensión” na que se atopan en casos como este. “Só podemos pisalos un a un e este ano son milleiros deles, exércitos que comen unha hectárea en dous días”, afirma un produtor de Beigondo, no concello de Santiso (Terra de Melide). Expertos explican que para estas terras a única posíbel solución sería “encalar o prado con cal viva, iso podería matar os vermes, mais tamén outros microorganismos beneficiosos". Así, a solución, polo de agora, é agardar á chegada das baixas temperaturas que limiten a expansión do verme. Á espera do frío e das xeadas Terían que ser o frío e as xeadas, que xa deberían afectar Galiza nesta época, as que se encargasen de rematar coa praga, pero a humidade e as altas temperaturas fan que o verme se multiplique en maior cantidade e máis rápido. O enxeñeiro agrónomo Fernando Núñez Mourelle explica a este xornal que “coa auga non morren, só coas xeadas. A auga pode facer que ataquen menos pero non acaban de morrer”. Estes vermes morren co frío, sen el hibernan e voltarán”.