A 'Pescanovan charade'

Alguén podería pensar que imos falar de Pescanova. Pois non. Chamouse 'A farsa de Pescanova' (The Pescanovan Charade), cun singular sentido do humor, a un informe publicado o 1 de xullo de 2014 por unha descoñecida empresa de Nova York, especializada en análises económicas e de investimentos, chamada Gotham City Research, outra particular mostra de humor, xa que na súa razón social invocaba a urbe de residencia do incorruptible Batman. Entre 2013 e 2018 Gotham publicou once informes sobre sociedades cotizadas en mercados de valores nos que avisaba de fraudes descoñecidas para os investidores, como foron os casos de Medifast e os riscos para a saúde dos seus produtos; o falseamento do ebitda de Endurance International Group; as irreais marxes de beneficios de AAC Technologies Holdings que dicían ser mellores que as de Apple; ou o endebedamento falseado de MDC Partners. Non falaba de Pescanova, aínda que si comparaba os feitos detectados nela un ano antes. O informe de Gotham trataba da madrileña Let's Gowex, S.A., fundada no 1999, pertencente ao sector das telecomunicacións e desde 2009 especializada na instalación de zonas de conexión wifi de balde en espazos públicos, como rúas, estacións de autobuses ou trens, etc. Gotham valoraba as accións de Gowex en cero euros baseándose en que os seus ingresos reais eran a décima parte dos declarados, que non existía modelo de negocio definido, que as súas débedas eran maiores que o seu efectivo e que, polo tanto, non tiña valor económico ningún e a súa información financeira era falsa. Naquelas alturas Gowex cotizaba no chamado MAB, hoxe BME Growth, que é o mercado para empresas medianas e pequenas, supervisado pola CNMV. No BME Growth cotizan estas empresas galegas: Altia, Commcenter, EiDF, Etex, Euroespes, Greenalia e IFFE Futura Un día despois, o 2 de xullo, sendo xa coñecedora unha CNMV presidida pola ex ministra do PP Elvira Rodríguez do informe sobre Gowex, actuou como Fernández Ordóñez coa crise bancaria. Mirou para outro lado e solicitou á Securities and Exchange Commission (SEC) dos USA información referida a quen era Gotham e os seus administradores para ver se os denunciaba por abuso de mercado. Conclusión, investigaron quen denunciaba a fraude, non o defraudador, esquecéndose de que empresa denunciada tiña 5.000 accionistas e un valor no MAB duns 1.400 millóns de euros. O maior das que daquela cotizaban nese mercado. Tras a pista da fraude De pouco lles serviu. Nos dous días seguintes o valor da empresa diminuíu nun 72% e logo foi suspendida a súa cotización. Nin a reacción do seu conselleiro delegado negando os feitos, acusando o informe de Gotham de anónimo e avisando, como fan todos, do inicio de accións legais contra os autores do informe e de que cambiaría o seu auditor, M&amp;A, co obxectivo de reforzar a transparencia da empresa. Pouco despois a empresa solicitou concurso de acredores e liquidouse, perdendo os accionistas todo o capital investido, como os de Pescanova. Demostrouse que os auditores, reguladores, avogados, banqueiros e outros rara vez detectan as fraudes. Agora ben, quen o ía dicir! Resulta que cotizar no BME Growth ten vantaxes para os accionistas que non teñen os de empresas do mercado continuo ou do IBEX35, nin moito menos os dos bancos. Cada empresa debe ter un "Asesor Rexistrado" que debe comprobar e asistir á compañía no cumprimento dos requisitos de incorporación. Debe revisar a información presentada no momento da súa incorporación e despois axudala a cumprir cos requisitos de información financeira periódica, ou na comunicación de feitos relevantes. Pois ben, se en febreiro a sala do penal do Supremo no asunto Pescanova, ben semellante ao de Gowex como dixeron os de Gotham, libraba a auditora BDO de responsabilidades, en abril a sala do civil do Supremo condena unha das big four, Ernst&amp;Young, a responder da perda de 120.000 euros duns accionistas de Gowex pola súa falta de control da información remitida pola compañía e comunicada ao mercado antes de destaparse a fraude. De camiño van moitas máis demandas. Así é que o Supremo conclúe que ten máis obriga de detectar a fraude o asesor rexistrado fronte ao auditor: unha "charada". No BME Growth cotizan media ducia de empresas galegas: Altia, Commcenter, EiDF, Euroespes, Greenalia, IFFE Futura e Netex. Unha delas, Euroespes, vén de pedir polas súas dificultades un plan de reestruturación cos seus acredores. O seu asesor rexistrado é Norgestión, S.A. Outra, EiDF, vén de ter suspendida a súa cotización pola negativa do seu auditor, PWC, a darlle o visto e prace ás contas do 2022. Neste caso o asesor rexistrado é DCM Asesores Dirección y Consultoría de Mercados, S.L. Ensinanza, mellor ser auditores ou reguladores que asesores rexistrados obrigados a ver as fraudes que os outros non ven e mellor as accións do BME que as do continuo os as dos bancos.