Maior produción, peor rendemento. Un mes máis, setembro fechou cos gandeiros galegos como os peor remunerados no sector lácteo estatal, co seu leite pagándose a un prezo de 47,48 céntimos o litro. Así se desprende do último informe publicado polo Ministerio de Agricultura sobre a situación do mercado vacún de leite, que evidencia unha lixeira caída do prezo na Galiza a respecto do mes anterior, agosto, cando fora de 47,57 céntimos por litro e, con todo, ficara igualmente na última posición da táboa.
Os escasos beneficios que os produtores e produtoras galegas obteñen do leite cru contrasta novamente coa bonanza dos seus compañeiros de profesión noutros territorios, como é o caso de Canarias, onde o litro se pagou en setembro a 60,29 céntimos, ou Asturias e País Valencià, cotizando en ambos os casos a 52,62 céntimos.
A nivel estatal, o prezo medio foi de 51,5 céntimos, catro máis que no caso galego, cuxos inmediatos competidores pola parte baixa da táboa son Illes Balears (49,42 céntimos/litro) e Madrid (50,10 céntimos).
Iso a pesar, porén, de liderar Galiza o sector no Estado español, con até 42% da produción total de leite cru en setembro, unha cifra que triplica a achega de Castela e León (13%), segunda con maior peso. Os seus gandeiros, porén, cobraron o litro de leite a 52,23 céntimos. E Galiza é tamén o territorio que conta con máis gandeiros e gandeiras con entregas de leite, un total de 5.759; ou, o que é o mesmo, máis da metade dos presentes en todo o Estado español (10.157).
E, como en tantos outros parámetros baseados neste informe, o país ten a menor fenda de xénero e é o máis próximo a lograr a paridade, con 60% de homes titulares de explotacións gandeiras e 40% de mulleres. A media estatal é de até 69% homes.
Na Galiza estes datos, que non resultan unha novidade e que se suman á denuncia de Unións Agrarias de que o xigante Capsa pagaría máis aos gandeiros asturianos que aos galegos, manteñen o sector en pé de guerra e urxindo solucións.