A taxa de inflación da zona euro situouse en febreiro no 2,6% interanual, dúas décimas por baixo da suba do 2,8% dos prezos no primeiro mes de 2024, mentres que no conxunto da Unión Europea baixou ao 2,8% desde o 3,1%, segundo confirmou esta segunda feira a oficina comunitaria de estatística, Eurostat.
Desta maneira, a cifra interanual do IPC para a Eurozona —conxunto de Estados que teñen como moeda oficial o euro— sitúase seis décimas por baixo da taxa galega, que a semana pasada o Instituto Nacional de Estatística (INE) cifrou en 3,2%, a segunda maior inflación do Estado español.
Con esta taxa, a Galiza situaríase entre os territorios da Unión Europea coa taxa de inflación máis elevada, por detrás de Romanía (7,1%), Croacia (4,8%) e Estonia (4,4%). As taxas máis baixas entre os 27 Estados conseguíronas Letonia e Dinamarca (0,6%) e Italia (0,8%).
Prezo do cesto da compra
No segundo mes de 2024, o dato de inflación na Eurozona obedeceu a unha caída interanual dos prezos da enerxía do 3,7% desde a baixada do 6,1% en xaneiro, mentres que os alimentos frescos encareceron un 2,1%, moi por baixo da suba de 6,9% do primeiro mes do ano.
O aumento anual do custo dos servizos mantívose no 4%, mentres que a suba do prezo dos bens industriais non enerxéticos atenuou ao 1,6%, catro décimas menos que en xaneiro.
Na Galiza, o prezo dos alimentos e bebidas non alcohólicas avanzou en febreiro un 5,3% interanual, taxa 2,1 puntos inferior á do mes anterior e a menos acusada desde xaneiro de 2022, mentres que o grupo de vivenda reduciu 4,2 puntos a súa taxa anual, até -2,7%, polo descenso dos prezos da electricidade, en contraste coa suba que experimentaran en febreiro de 2023.
