Transporte e cultura súmanse á alimentación para manter alta a inflación

O mes de febreiro deste ano rematou na Galiza cun Índice de Prezos de Consumo (IPC) interanual de 3,2% e segue a ser a segunda con máis inflación do Estado español, só por tras de Estremadura (3,3%), segundo os datos que deu a coñecer onte o Instituto Nacional de Estatística (INE). Queda, desta maneira, catro décimas por riba da media estatal no mesmo período, que marcou desta vez un 2,8%, e sumará sete meses coa inflación máis elevada que o conxunto do Estado español. Todo isto malia a moderación na taxa mensual en febreiro que foi, en relación a xaneiro, de 0,2% na Galiza e de 0,4% no caso estatal. Pola súa parte, a inflación subxacente (sen alimentos non elaborados nin produtos enerxéticos) baixou unha décima en febreiro, até 3,5%. Para o investigador e profesor de Historia Económica da USC, Adrián Dios, en declaracións a Nós Diario, estes primeiros datos indican que “semella que nos achegamos á normalización da inflación que aspiraba a Unión Europea, co seu obxectivo de ter un 2%”, algo que considera “unha boa noticia”. O IPC modérase seis décimas na Galiza, que fica coa segunda maior inflación do Estado: así evolucionan os prezos de cada produto Con todo, recoñece que este 2024 “segue aberta a posibilidade de riscos de que a taxa volva aumentar”, sobre todo no contexto internacional actual de incerteza “tendo en conta o que acontece en Iemen e o problema que hai na cadea global de subministros” ademais dunha situación enerxética que cualifica de “inestábel”. Suba nos produtos básicos A moderación do Índice Xeral do IPC non se reflicte en aspectos relacionados cos produtos básicos da cidadanía. Por grupos, na Galiza, o de alimentación e bebidas non alcohólicas segue en taxas interanuais elevadas, cun 5,9% en febreiro malia o descenso con respecto a xaneiro de -0,3%, e por riba da media estatal que indica un 5,3%. Peor dato ten o de restaurantes e hoteis que aumenta 0,6% e queda na taxa interanual de 6,6%, lonxe do 5,5% do conxunto do Estado español. Na comparativa co mes anterior no caso galego, a maior suba protagonízouna o lecer e a cultura (1,9%), ao que lle seguen transporte (1,6%) e bebidas alcohólicas e tabaco (1,1%). En relación ao transporte, segundo indica o mesmo INE, a suba explicaríase, en gran medida, polo aumento dos prezos de carburantes e lubricantes para vehículos persoais. Tamén influíu o aumento dos prezos do Transporte combinado de pasaxeiros. O abaratamento da luz modera o IPC seis décimas en febreiro, até 2,8%, e a inflación subxacente baixa a 3,4% En relación aos grupos que tiveron un resultado negativo, os máis importantes son o vestido e o calzado (-3,1%), así como o grupo de vivenda, auga, electricidade, gas e outros combustíbeis (-1,3%). Neste caso, o organismo estatal apunta ás rebaixas de inverno que levaron ao grupo de vestido e calzado a recortar os seus prezos un 1,8% respecto a xaneiro, mentres que o abaratamento da electricidade propiciou que a taxa mensual do grupo de vivenda tivese unha baixada de 1,3%. Nos subgrupos, con cifras estatais por non constar as relacionadas coa Galiza, na alimentación o produto alimentario que máis subiu de prezo no último ano foi o aceite de oliva (+67%), seguido dos zumes de froitas e vexetais (+18,8%). Febreiro tamén subas interanuais importantes nos prezos do transporte marítimo de pasaxeiros (+23,1%), os paquetes turísticos estatais (+18,7%) e o transporte de pasaxeiros por metro (+17,4%).Pola contra, o que máis abaratou no segundo mes do ano en relación a febreiro de 2023 foron os outros aceites (-24,6%), o gas natural (-21%), os equipos de telefonía móbil (-10,9%), o butano e o propano (-10,1%) e os computadores persoais (-9,9%). A Galiza rexistra en xaneiro a maior suba de prezos da península Ibérica “Realmente o que vemos é que ao final os produtos básicos, fundamentalmente os alimentos, son os que continúan subindo”, constata Adrián Dios. Este investigador vai máis alá e salienta que “se botamos a vista atrás e chegamos até o momento en que comezou a inflación, desde 2021, os alimentos máis empregados son os que aumentaron en maior medida o seu prezo” destacando como exemplos "o aceite, as verduras e a carne". Tipos de xuro e decisións políticas a nivel europeo Con estas cifras, Adrián Dios conclúe que a lectura importante non é “só sobre a inflación, senón sobre decisións de política económica” que, entre outros temas, ten que ver “fundamentalmente en relación aos tipos de xuro”. Para este economista, o Banco Central Europeo segue mantendo “unha política moi estrita de restrición, con tipos de xuro relativamente altos para tentar controlar a inflación”. Pola contra, considera que “os sinais que nos envia nestes momentos a inflación, cada vez máis controlada, con esta decisión política o investimento está comezando a resentirse”. Este “purismo conservador” da institución económica europea, en opinión de Adrián Dios, pode “acabar por ser un problema, non só para a Galiza e o estado español, senón para o conxunto de países da zona euro por afectar ás súas economías”. O Banco de España rebaixa as previsións de alza de prezos: a inflación subiría 2,7% este ano e 1,9% o seguinte Valoración positiva do Goberno español Desde o Goberno español, o Ministerio de Economía destacou, nunha valoración remitida aos medios, que a redución da inflación "pon de manifesto a capacidade da economía española de facer compatíbel o maior crecemento económico entre os principais países da zona euro cunha moderación dos prezos e co mantemento das medidas do escudo social apoiando aos máis vulnerábeis". Así mesmo, o Departamento que dirixe Carlos Cuerpo subliñou que esta redución sostida da inflación, permite mellorar o poder adquisitivo das familias e a competitividade das empresas españolas. Tamén a Confederación Española de Organizacións Empresariais (CEOE) valorou de maneira positiva o IPC de febreiro. A patronal, a través dun comunicado, afirmou que a evolución dos prezos estará condicionada polo ritmo de reversión das medidas antinflacionarias e os prezos das materias primas nos mercados internacionais. Segundo a CEOE, os alimentos seguen a ser o elemento máis inflacionista no inicio de 2024, aínda que observa unha "significativa desaceleración" das súas taxas de incremento. Porén, salientan que "tanto os prezos dos alimentos elaborados como os non elaborados sitúanse na súa taxa máis baixa desde que comezou a guerra en Ucraína". O salario real na Galiza caeu 4,8%, a segunda maior perda do Estado Segue a "tensión inflacionaria" A Galiza suma sete meses seguidos, desde agosto de 2023, cunha inflación superior á do Estado español. Para Adrián Dios, alén da repercusión que ten a suba nos produtos relacionados coa alimentación, a razón do que denomina “tensión inflacionaria maior” ten que ver coa vivenda e o transporte. “No primeiro caso o prezo dos inmóbeis medrou no país moito máis rápido que no Estado, sen ter que ver con que o importe aquí sexa máis elevado que noutros lugares”, afirma.