O presidente da Asociación Empresarial da Restauración, Aloxamento e Turismo de Compostela e Comarcas (Hostalaría.gal), Lois Lopes, denunciou nesta sexta feira que máis de 300 empresas, "50 ou 60% dos hostaleiros de lecer nocturno de toda a Galiza", teñen que devolver as axudas concedidas pola Xunta ao sector durante a pandemia.
Nunha rolda de prensa en Santiago, Lopes cualificou a actitude da Xunta de "falta de sensibilidade" co sector do lecer nocturno após os expedientes de reintegro, iniciados o día 1 de agosto, para as axudas concedidas na orde do 14 de xuño de 2021.
Desta forma, o presidente da asociación sinalou que a Xunta pide a devolución con base en que estes estabelecementos tiveron ingresos durante o primeiro e segundo trimestre dese ano. Así, lembrou que a actividade dos locais incluídos no grupo de lecer nocturno podían desenvolver a súa actividade no primeiro trimestre do ano, en concreto, até "mediados" do mes de xaneiro.
No que atinxe ao segundo trimestre de facturación, lembrou que a actividade do lecer nocturno en interior estaba prohibida. Con todo, todos aqueles que puidesen desenvolver a súa actividade diúrna no exterior fixérono "en base á normativa establecida".
Devolución de até 35.000 euros
O presidente da asociación alertou que, con data do pasado 1 de agosto, o Goberno galego iniciou un proceso de reclamación que se devolvan esas axudas. "Están a pedir a devolución das axudas de até 35.000 euros cos correspondentes xuros de demora", apuntou Lopes. Aliás, insistiu en acusar á Xunta de "unha falta de sensibilidade" co sector do lecer nocturno, "o máis afectado" durante a pandemia.
Ante este procedemento, a asociación confirmou que solicitou unha reunión co vicepresidente segundo e conselleiro de Presidencia, Diego Calvo, para tratar esta problemática, de momento non obtiveron nin resposta nin data, segundo Lopes.
