O Goberno estatal descarta baixar o IVE do peixe e da carne a pesar da petición do sector

O Executivo do Estado español analizou esta segunda feira coas cadeas de supermercados, o sector da distribución, a industria agroalimentaria e o sector primario no Observatorio da Cadea Alimentaria a evolución dos prezos da alimentación e o impacto da rebaixa do Imposto sobre o Valor Engadido (IVE) en determinados produtos, aprobado polo Goberno estatal hai un mes para paliar o golpe da inflación nos fogares. Poden o polbo, os chocos e as luras garantir a seguranza alimentaria? O ministro español de Agricultura, Pesca e Alimentación, Luis Planas, presidiu o pleno do observatorio na sede do Ministerio de Agricultura, despois de convocalo con carácter extraordinario a pasada semana tras coñecerse que a inflación dos alimentos alcanzou unha taxa de 15,4% no último mes, tras a rebaixa do IVE aplicada a certos produtos da cesta da compra. Os sectores da agricultura, da gandaría e da pesca reclamaron na reunión do observatorio que se baixe o IVE a máis alimentos como a carne, o peixe, os iogures e o mel, entre outros, pois están a atravesar "uns momentos moi complicados", argumentaron. Porén, Planas volveu descartar a posibilidade de baixar o IVE á carne e ao peixe, a pesar de que recoñeceu que algúns actores da cadea solicitáronllo na reunión. "Decidimos reducir o IVE dos alimentos de maior consumo e os que máis subiran os prezos. Imos seguir examinando alternativas", indicou ao respecto. A inflación dos alimentos Tras a reunión, Planas sinalou que cree que a inflación dos alimentos tocou teito e pediu aos diferentes eslavóns da cadea alimentaria que reflictan esa diminución de prezos para que chegue ao peto da cidadanía. "Tomeime a licenza de solicitar a todos os axentes da cadea que poñan da súa parte un esforzo para conseguir que o que prevemos unha evolución positiva dos custos de produción teña un reflexo nos prezos pagos polas familias e cidadáns", sinalou. Sobre a solicitude realizada polo titular de Agricultura na reunión, explicou que se trata "dunha petición concreta de que a evolución dos custos de produción se traslade na negociación que ten lugar nos eslavóns da cadea. A resposta unánime dos participantes foi positiva. Todo o mundo quere facer un esforzo segundo as súas posibilidades", afirmou o representante do Executivo do Estado español. 17% dos alimentos con rebaixa do IVE encareceron no mes de febreiro Con todo, o ministro advertiu de que van estar "moi vixiantes" en facer un seguimento aos prezos. "Espero e desexo que se cumpra esta petición, porque recibín unha resposta positiva por parte deles e espero que se reflicta na realidade", asegurou. "Temos razóns para pensar que o Índice de Prezos de Consumo (IPC) dos alimentos tocou teito", proseguiu o ministro español. "Non só pola análise internacional senón pola decidida vontade do Goberno de facer canto estea na nosa man para que todas as medidas constitúan un apoio á produción e rendibilidade empresarial", concluíu. Ademais, a vicepresidenta e ministra española de Asuntos Económicos e para a Transformación Dixital, Nadia Calviño, afirmou, en relación á proposta de Unidas Podemos de bonificar en 14% certos produtos do cesto da compra, que as medidas que se adoptaron polo Executivo estatal para reducir o prezo dos alimentos están a ser "eficaces" e "aínda teñen percorrido". Discrepancia entre as dúas partes do Goberno estatal "Desde hai tres anos viñemos escoitando moitísimas propostas, incluídas as dos partidos que están no Executivo. Desde o Goberno o que facemos é actuar con responsabilidade. Cada medida analízase, vese cal é o momento adecuado ou non. Eu interpreto sempre que todas se fan coa mellor das vontades, mais trátase de cuestións moi complexas que poden ter un impacto moi significativo sobre as finanzas públicas", sinalou a vicepresidenta española. Pola súa parte, Unidas Podemos desdeñou a reunión do ministro de Agricultura cos representantes dos supermercados dado que non espera ningunha medida válida para baixar o prezo dos alimentos. O seu coportavoz, Pablo Fernández, afirmou que a gran distribución é parte do problema da inflación destes produtos por actuar como "saqueadores", "especuladores" e "capitalistas desapiadados". Fernández retou o PSOE a "vencer os seus medos" e a que non lle "treman as pernas" para decantarse pola solución ante a alza do cesto básico da compra. Os alimentos lideraron a suba de prezos nos últimos 12 meses ao encarecer 15,6% A portavoz do PP no Congreso estatal, Cuca Gamarra, sinalou ao respecto que "o prezo dos alimentos segue moi alto e o Goberno, mentres recada polo novo imposto ao plástico, rexeita a proposta do Partido Popular de baixar o IVE de carne, peixe e conserva". Ademais, o portavoz do BNG no Congreso español, Néstor Rego, en declaracións a Nós Diario, apostou polo tope dos alimentos básicos como a mellor medida contra o alto IPC. "Non se pode confiar tan só nas boas intencións e na boa vontade do sector da distribución alimentaria, a mellor opción é pór tope aos alimentos fundamentais do cesto da compra", afirmou Rego, que fixo un chamamento ao Goberno estatal para que rectifique a súa negativa a ampliar a bonificación do IVE aos produtos cárnicos e pesqueiros. A situación do sector da pesca "é moi complicada" Unha das organizacións representadas na reunión do Observatorio da Cadea Alimentaria foi a Federación Estatal de Confrarías de Pescadores. O seu presidente, tamén patrón maior do porto de Burela, Basilio Otero, en declaracións a Nós Diario, explica que a súa presenza no encontro serviulles para trasladar unha vez máis a súa petición de que se rebaixe o IVE dos produtos pesqueiros. "Aproveitamos para reivindicar a necesidade dunha rebaixa no IVE do peixe, unha solicitude que levamos moito tempo facendo", afirma Otero. "Non esperamos unha resposta", conclúe sobre a posibilidade de que o Executivo estatal acceda a desenvolver esta redución dos tributos. "Un alimento saudábel" "É certo que a rebaixa do IVE suporía unha mingua dos ingresos directos da Facenda, mais tamén é verdade que se estaría a fomentar o consumo dun alimento como o peixe que está demostrado que é saudábel, o que tamén derivaría nun menor gasto sanitario", sinala o representante das confrarías. "Non hai unha medida máxica para solucionar a crise que está a vivir o sector, mais a rebaixa do IVE axudaría", explica Otero. "A situación é moi complicada", conclúe o patrón maior de Burela.