A Galiza lidera a caída da compra de vivenda no Estado

A compravenda de vivendas rexistrou en xullo na Galiza un descenso de 22,8% con respecto ao mesmo mes de 2022, o máis alto entre o conxunto das autonomías do Estado, ao se rexistraren un total de 1.426 operacións, segundo os datos que publicou esta cuarta feira o Instituto Nacional de Estatística (INE). A caída interanual das compravendas de vivenda alcanzou na Galiza unha taxa (22,8%) que supón máis do dobre da rexistrada no conxunto do Estado (10,5%). Ademais, en termos mensuais, en comparanza co mes de xuño, as operacións de compravenda de vivenda baixaron 12,8%, máis de dous puntos porcentuais por riba da taxa rexistrada a nivel estatal (10,5%). A cantidade de compras e vendas de casas no mes de xullo supoñen 65 por cada 100.000 habitantes. Unha ratio que se atopa moi lonxe da experimentada no País Valencià (a maior do Estado español), de 189 por cada 100.000 habitantes. En total, na Galiza transmitíronse 2.732 vivendas en xullo, delas 1.426 foron compravendas, 21 doazóns, tres permutas, 622 herdanzas e 660 operacións doutro tipoloxía. As compravendas correspondéronse fundamentalmente con transmisións de vivenda libre (1.380) e de vivenda usada (1.122), fronte a un total de 46 protexidas e 304 novas. Pola súa parte, o total de predios transmitidos no país no mes de xullo ascendeu a 7.675 (10,3% menos en variación interanual, representando 350 operacións por cada 100.000 habitantes). Deles, 2.628 eran predios rústicos e o resto, urbanos (2.732 vivendas, 161 solares e 2.154 predios urbanos doutra clase). Vivenda protexida Ao atender á taxa de compravendas de vivenda protexida sobre o total das operacións de adquisición, a Galiza tamén fica moi por detrás do conxunto do Estado español. Desta forma, mentres que a nivel galego tan só 3,2% das compravendas foron de vivenda protexida no mes de xullo, esta taxa é de máis do dobre a nivel estatal, de 7,3%. Esta diferenza na aposta pola vivenda protexida a nivel galego e estatal trátase dunha dinámica permanente e non dunha cuestión do mes de xullo. Desta forma, nos sete primeiros meses do ano 2023, a porcentaxe de compravendas de vivendas protexidas entre o total de operacións de adquisición na Galiza foi de 3,1%, mentres que no conxunto do Estado español a taxa ascendeu a unha porcentaxe de 7,8%. A Xunta destina só 8 millóns de euros en 2023 a vivenda de promoción pública De feito, neste período de Goberno do PP á fronte da Xunta da Galiza, desde xullo de 2009, cando Feixoo chegou á Presidencia do Executivo galego, a porcentaxe de compravendas de vivenda protexida sobre o total de operacións de adquisición no país foi de 4,9%, unha taxa que se reduce á metade da rexistrada a nivel estatal durante o mesmo período, onde alcanzou 9,8%. Casas baleiras As maiores cotas de vivenda baleira do Estado sobre o total de vivendas danse nas zonas de interior e do noroeste peninsular, especialmente na Galiza, pois as comarcas das circunscricións de Ourense e Lugo fican á cabeza, xa que contabilizan 43,7% e 37,3% do seu parque residencial baleiro. Estas porcentaxes supoñen case o triplo da taxa experimentada no conxunto do Estado, de 14,4%, segundo os datos dun estudo elaborado polo portal de valoración de inmóbeis Tinsa. As maiores cotas de vivenda baleira do Estado danse no interior e no noroeste da península Ibérica, sobre todo en comarcas galegas Ademais, a liña de costa do noroeste da Galiza atópase entre as zonas do Estado con maior concentración de vivendas baleiras en termos absolutos. "A concentración de vivendas baleiras en determinadas localizacións é a miúdo consecuencia das tendencias demográficas e da obsolescencia da oferta construída pasada, a cal compite coa actual e os extensos prazos na tramitación xurídica para a posta no mercado dos inmóbeis que avalaban créditos resultado da crise de 2008", explica Tinsa. Asesoramento do IGVS O director do Instituto Galego de Vivenda e Solo (IGVS), Heriberto García, recoñeceu esta cuarta feira que o ente limitou o asesoramento á cidadanía, de modo que o persoal "non cumprimenta directamente a solicitude [para o depósito ou a cancelación de fianzas]", posto que "non responde a ningún tema de fenda dixital". Ante as preguntas da deputada do BNG Alexandra Fernández, o director do IGVS afirmou no Parlamento que se trata de "servizos inapropiados". Unha resposta que Alexandra Fernández considerou un "eufemismo", coa que entende que se admite o "recorte". O IGVS aclarou no verán, a xuízo da deputada, "que as cousas se deixan de facer como se viñan facendo". Neste sentido, censurou que a Xunta "está a afondar na fenda dixital e vulnerando o dereito á atención presencial e dificultando que a xente faga estes depósitos". Pontón fixa como prioritaria a "transferencia gratuíta" das vivendas da Sareb á Galiza A Sareb e a FEMP asinan un acordo para a promoción da vivenda social Precisamente esta semana, a Sociedade de Xestión de Activos Procedentes da Reestruturación Bancaria (Sareb), chegou a un acordo coa Federación Española de Municipios e Provincias (FEMP) co obxectivo de estabelecer unha colaboración mútua para impulsar a vivenda social no conxunto do Estado, segundo informou a Sareb. Este acordo ten unha duración de catro anos e poderá prorrogarse por períodos anuais até un máximo de catro anos adicionais.