As enerxéticas ven nas novas normativas da UE unha oportunidade para diminuír os requirimentos ambientais á enerxía eólica

Manuel Pazo, o presidente da Asociación Eólica da Galiza (EGA), manifestou esta terza feira ter as súas "dúbidas" e ser "bastante escéptico" sobre a posibilidade de que a sociedade público-privada que impulsa a Xunta da Galiza no sector "funcione ben". Na súa opinión, para salvar o rexeitamento social, o cal cualificou de "pouco razoábel", sería preferíbel "atar máis as empresas" con "máis impostos ou o que sexa", por exemplo "máis actividades sociais ou culturais". Ademais, o líder da patronal eólica continuou coa súa 'cruzada' contra as actuacións da Xustiza, exercendo presión unha vez máis para obter sentenzas favorábeis aos intereses das empresas enerxéticas. Neste sentido, Pazo afirmou que espera que o Tribunal Supremo (TS) se pronuncie a final deste ano sobre o fondo do asunto que levou á anulación e á suspensión cautelar de parques eólicos na Galiza, o que cualificou de "bastante sorprendente" . Continuando coa súa carga contra os tribunais, aseverou que "o que dá inseguridade é a interpretación dunha norma comunitaria" sobre os tempos de exposición pública e os informes correspondentes. "O que se está facendo na Galiza non se fai no resto do Estado", suxeriu. Galiza ten a maior ratio do Estado de implantación da enerxía eólica no territorio Da mesma forma, o representante da EGA criticou as persoas e colectivos que exercen denuncias contra a implantación de parques eólicos no territorio galego. Así, afirmou, que é a "rabia" o que leva "os mesmos grupos" a interpor "as mesmas alegacións" aos proxectos. Teresa Ribera aposta polas facilidades ás enerxéticas O presidente da patronal eólica depositou as súas esperanzas na nova normativa comunitaria -no contexto das negociacións sobre a nova reforma do mercado enerxético que concluíron esta terza feira en Luxemburgo-, que "declara de interese xeral especial ou urxente sobre o interese moitas veces ambientais" as iniciativas do sector. "Que se lle dea o mesmo valor á enerxía que ao medio ambiente", resumiu sobre o contido da norma. Unha argumentación que certificou a semana pasada a ministra española para a Transición Enerxética e o Reto Demográfico en funcións, Teresa Ribera, que no contexto das actuais negociacións a nivel comunitario, apostou por multiplicar por tres a instalación de enerxía renovábel. Para isto, aclarou, é "importante" facilitar os trámites e procedementos de permiso. Ademais, a ministra tamén sinalou que a situación de avaliación de impacto ambiental será decisiva e converterase nun dos desafíos para o mandato do Goberno estatal que sexa finalmente investido. "Agora, estando en funcións, obviamente non podemos adoptar ningún tipo de modificación", apuntou Ribera. 0,5% do emprego no país Tendo en conta que as persoas afiliadas á Seguridade Social na Galiza ao fechamento do ano 2022 eran 1.032.624, os 5.494 empregos que xeraba a produción enerxética a partir do vento, segundo datos da propia patronal eólica, supuñan tan só 0,5% dos traballos no país, un dato que contrasta co peso de 1,6% que o sector afirma que tivo no Produto Interior Bruto (PIB) galego durante o mesmo ano. O sector da produción de enerxía eólica é o que menos emprego xera na Galiza Ademais, moitas das empresas que achegan a súa produción á estatística relativa ao PIB do país teñen capital foráneo e sede fiscal en terceiros países, polo que unha boa parte dos beneficios procedentes da súa actividade na Galiza non teñen repercusión sobre a sociedade galega. Aínda así, a relevancia laboral da xeración de enerxía a partir do vento é tres veces menor ao peso na economía en termos de PIB. Excedente de electricidade Ante o baixo peso que o sector ten no emprego, a patronal reivindica o desenvolvemento dos seus proxectos como base para a implantación de iniciativas industriais, presentándose como fundamental para a súa instalación no territorio galego, a pesar de que a produción eléctrica supera a demanda. Precisamente en 2022, ano ao que se refire o estudo presentado pola EGA, 40,4% da produción galega de enerxía eléctrica non foi consumida no país. En 2022, 73% da electricidade foi xerada na Galiza a partir do vento Nese ano, até 73% da electricidade consumida na Galiza foi xerada a partir do vento, mentres que esta taxa alcanzou só 22% (incluíndo tamén a solar) na Unión Europea (UE) e 33% no Estado. Tendo en conta todas as tecnoloxías renovábeis e non só a solar e a eólica (segundo o informe Global Electricity Review do think tank Ember), a Galiza xerou máis de 100% da electricidade que consumiu o pasado ano con estes métodos de produción. Así, en 2022 xerouse no país 109% da enerxía demandada a través de métodos renovábeis, unha taxa que no caso do Estado español ficou nunha porcentaxe de 46,5%. Facendo o cálculo sobre o total da produción, a Galiza xerou a través de métodos renovábeis 65% da enerxía eléctrica que produciu. Ademais, cada 1.000 hectáreas da Galiza teñen, de media, máis de 13 megawatts (MW) de potencia eólica instalada, o que converte o territorio galego no que ten maior implantación desta enerxía en relación á superficie en todo o Estado. Luz verde á reforma do mercado eléctrico da UE Os ministros e as ministras de Enerxía e Clima da Unión Europea (UE) alcanzaron esta terza feira en Luxemburgo un acordo sobre a reforma do mercado eléctrico para que os prezos desta enerxía dependan menos da volatilidade dos combustíbeis fósiles, co respaldo de todos os Estados, coa única excepción de Hungría. Agora, tras lograr desbloquear as posicións enfrontadas de París e Berlín, o Consello Europeo está listo para iniciar negociacións co Parlamento Europeo e coa Comisión Europea par acordar o texto final, nunhas conversacións que comezarán mañá. Porta aberta á nuclear Francia, que logrou que a enerxía nuclear poida entrar nos novos contratos por diferenza, advertiu que se os equilibrios alcanzados esta terza feira non se manteñen, tampouco persistirá este acordo. A UE pacta subir a 42,5% a produción de enerxía "verde" tras ceder ante a nuclear francesa Os novos contratos por diferenza estabelecen un vinculo que define obrigas mutuas entre os Estados e as empresas enerxéticas de forma que se estipula que serán compensadas as diferenzas entre o prezo da electricidade no momento no que se produza a súa venda e o custo cando se asinen os contratos, provocando que as firmas reciban uns ingresos estábeis pola electricidade que producen para reducir a volatilidade nos mercados.