Ecoloxía versus agricultura

O sector agrario converteuse nos últimos tempos na arma dunha auténtica guerra política, na que non faltan bulos e mensaxes para manipular a xente do medio rural e da sociedade en xeral. Un dos mantras máis empregados pola dereita é culpabilizar as chamadas políticas verdes da falta de rendibilidade e dos problemas do sector agrario. A mesma dereita que vota en contra de garantir por lei prezos dignos en orixe, que se abstivo na votación da Lei da cadea que incluía prohibir a venda a perdas ou que promove os chamados Acordos de Libre Comercio con terceiros países para importar inxentes cantidades de alimentos cuestiona e culpa o ecoloxismo de que non se poidan empregar agrotóxicos prohibidos pola súa perigosidade para a saúde, da redución no abuso de antibióticos, cando no propio Estado español os casos de mortes por bacterias resistentes aos tratamentos antimicrobianos superan as 3.000 anuais, ou mesmo polas esixencias medioambientais que se lles fan a macroproxectos con grandes impactos de todo tipo (enerxéticos, mineiros, macrogranxas…). A protección do medio ambiente e a protección dun medio rural habitado e dinámico van necesariamente da man, e son as actividades agrarias e gandeiras as que xeran o movemento económico necesario para que, de xeito indirecto ou directo, a maioría da poboación poida desenvolver os seus proxectos de vida nestes lugares, pero tamén as que deron orixe ou conservan a maioría dos valores ecosistémicos que caracterizan os espazos de alto valor natural. Non se podería concibir de xeito disociado da propia actividade agrícola ou gandeira a existencia dos socalcos da Ribeira Sacra, nin das turbeiras do Xistral, dos pasteiros permanentes das zonas de montaña ou das brañas, por pór só algúns exemplos. Hai unhas semanas a dereita volveu presentarse como a abandeirada dos "agricultores españois" defendendo os regadíos ilegais de Huelva. Agacharon, iso si, que un 2,5% desas empresas, a maioría en mans de capital estranxeiro e de fondos de investimento, están a acaparar o 63% da terra da zona e o 80% do volume de auga autorizada; e que son as responsables de condicións laborais absolutamente deplorábeis e da ruína da pequena e mediana agricultura. Avaliación de impacto A moratoria eólica da Xunta expirou o 30 de xuño Galicia tampouco é allea a toda esta campaña de desinformación e de intoxicación. Neste momento, coa denominada Lei de promoción dos beneficios sociais e económicos dos proxectos que utilizan recursos naturais de Galicia, a Xunta está a promover un novo cambio lexislativo para favorecer a instalación de grandes proxectos enerxéticos e mineiros, creando o marco legal para posibilitar as fragmentacións de megaparques eólicos, que contan actualmente con sentencias desfavorables, ou mesmo incluíndo nas declaracións de impacto ambiental criterios como os económicos ou as promesas de xeración de emprego. No mes de xuño, expirou o prazo de 18 meses da chamada moratoria eólica, coa ameaza dunha maior intensificación no espolio eólico que está a vivir o país, ao que habería que engadir a ameaza dos grandes aproveitamentos hidráulicos proxectados ou da eólica mariña. O que compromete as nosas vivendas, a nosa calidade de vida e mesmo o futuro de gran parte dos proxectos gandeiros e agrícolas que temos nas nosas comarcas non é o feito de que se realicen avaliacións de impacto ambiental solventes deses megaproxectos senón a instalación de proxectos con grandes impactos. Recentemente, catro vacas morreron polo impacto dunha tormenta eléctrica nas inmediacións do parque eólico de Sotavento, situado entre Monfero e Xermade. Ante este feito e a existencia de investigacións como a da Universitat Politécnica de Catalunya, que defenden que hai unha relación directa entre o movemento das turbinas dos aeroxeneradores dos parques eólicos e a xeración de descargas en determinadas condicións atmosféricas, o Sindicato Labrego Galego pediulles ás Consellerías de Industria e do Medio Rural que se investigue este acontecemento e se actúe segundo o principio de precaución, dado que hai moitas vivendas e persoas que desenvolven a súa actividade cerca dos polígonos eólicos. Un mes despois Industria non contestou e a resposta de Medio Rural foi que nin a investigación nin tomar medidas cautelares entran dentro das súas competencias, sinalando que para ese tipo de mortes hai seguros agrarios. É evidente que a avaliación dos impactos dos proxectos é algo verdadeiramente importante e que debe realizarse con garantías. Non debemos permitir que nos enganen e confundir o inimigo.