luns 25.05.2020

A conversión de NCG en fundación terá que esperar ao non contemplar a lei como facela

A conversión de NCG en fundación especial retrásase ao non existir na Galiza unha lei que regule estas entidades. "Todo está no ar", lamentan desde os sindicatos
Nova Galicia Banco
Nova Galicia Banco

A conversión de Novacaixagalicia en fundación de carácter especial (centrándose así na xestión e traballo da obra social) está paralizada á espera de que Galiza se dote dun marco legal que permita regular estas entidades. A conversión, defendida por sindicatos e organizacións políticas e finalmente tamén asumida pola propia Xunta, non poderá levarse a cabo polo de agora, tendo que agardar á toma de posesión do novo goberno saído das urnas o 21-O e a que este dea os pasos precisos neste sentido.

"Polo de agora, está todo no ar", recoñecen na CIG-Banca, sindicato que, ao igual que o resto con representación en NCG (CCOO, UGT, FSIE e ASCA) avogan por unha conversión en fundación especial, iso si, "cun padroado de profesionais independentes" e non remunerados. A proposta presentada polo PP a comezos de verán era un patronato con que 4 dos seus 12 integrantes fosen nomeados polo goberno, outros 4 polo Parlamento e cunha Xunta con capacidade de designar presidente e mesmo de poder vetar determinados responsábeis.

Financiamento, a cuestión chave

A aposta por transformar NCG en fundación especial é que a entidade pase ter como principal finalidade e obxectivo traballar e centrarse na obra benéfico social. E iso abre unha interrogante sobre o financiamento. Unha parte dos ingresos previstos tiñan que proceder dos dividendos derivados da participación de Novacaixagalicia en NGB (Novagalicia Banco), do que posúe por volta dun 7% das accións. Mais esta vía "é complicada, con todo o que está a acontecer", recoñecen desde o sindicato nacionalista. A recapitalización de NGB pode implicar que o peso de Novacaixa galicia no banco quede moi minguado.

Outras fontes de financiamento (acordos con terceiros, cobrar por derteminadas actividades ou servizos,..) tamén están previstas para ser percorridas.Mais o certo é que a conversión en fundación especial é un paso moi necesario para atinxir eses obxectivos. E este paso está aprazado ao non existir unha lei que regule ese tipo de entidades. Existe lexislación que di que a caixa ten que ser fundación, mais non se regula nada a este respecto, nin sobre o seu réxime fiscal, nin sobre o seu padroado.

Blindar

A conversión en fundación non é un tema simple, pois tamén supón, de certa maneira, protexer o patrimonio procedente de CaixaGalicia e Caixanova perante as intencións da Unión Europea de fixar unha 'quita' aos e ás accionistas de entidades financeiras nacionalizadas.

comentarios