A xavelina de Gustavo Dacal renace en Pontevedra e soña con medallas

O dez veces campión de España de lanzamento de xavelina, Gustavo Dacal, confirmou esta pasada fin de semana no Centro de Tecnificación de Pontevedra a súa recuperación para o deporte galego de elite. Tres meses despois de comezar os adestramentos tras unha terríbel enfermidade que o deixou en cadeira de rodas, o deportista de Ponte Caldelas conseguía, no mesmo lugar que foi testemuña do seu récord estatal hai 20 anos, rachar con 29,48 metros a anterior plusmarca na categoría ao superala nun metro. O drama de México Desde a súa chegada ao atletismo, Dacal contou cunha traxectoria deportiva ascendente na acumulou numerosos títulos e mellores marcas, como o récord de España de lanzamento de xavelina -que ostentou entre os anos 2003 e 2018- ou os dez títulos de campión Estatal. Ademais, participou en varias probas do nivel do Campionato de Europa, o Mundial de Atletismo ou os Xogos do Mediterráneo. Porén, a súa vida mudou en decembro de 2022 tras contaxiarse de dengue en México. A súa situación tivo moita repercusión no atletismo galego e mesmo, para tratar de axudalo, a Federación Galega de Atletismo (FGA), en colaboración coa Sociedade Ximnástica de Pontevedra (SXP), organizaron en xaneiro de 2023 unha proba solidaria que denominou Axudemos a Gustavo Dacal. Despois de pasar uns meses de hospital nese país, onde mesmo chegou a perigar a súa vida, regresou á Galiza en febreiro de 2023 para seguir tratándose no Hospital Universitario da Coruña (CHUAC). En maio deste ano, o deportista estaba xa case recuperado e confirmaba que o que o seu próximo obxectivo sería participar nos próximos Xogos Paralímpicos de París 2024. O "milagre" da súa recuperación Para o seu adestrador, Javier López, a recuperación non ten ningún misterio. Explica a Nós Diario que o deportista de Ponte Caldelas desde que lle deron a alta hospitalaria tardou “semanas” en volver a traballar. “É a súa maneira de ser e a súa forza de vontade”, asegura López, “comezou desde o primeiro minuto coa fisioterapia e tivo moita constancia para que a rehabilitación fora moi ben”, engade. Na pronta recuperación tamén tivo que ver a súa experiencia en México con deportistas paralímpicos. “El mesmo leva o seu plan de traballo e diría que tamén o traballo principal”, recoñece López. Desde o inicio colleu forzas e dentro da planificación estaba como primeiro obxectivo “atacar o récord de España coa idea de que se visibilizara esta modalidade na Galiza e no Estado español”. A vontade de Dacal contou co apoio das federacións de cadeira e atletismo, malia non contar con experiencias anteriores semellantes. “A especialidade require un banco adaptado e nin os xuíces coñecían o regulamento oficial”, admite López, “mais coa experiencia do propio Gustavo conseguimos levar adiante a xornada en Pontevedra”, engade. O resultado superou as espectativas de ambos os dous e, aínda que non contará co recoñecemento mundial por non realizarse nunha proba internacional, "a marca, en todo caso, sería a quinta do mundo na súa especialidade", indica o adestrador de Dacal. Volta á Galiza o ex atleta Gustavo Dacal após padecer dengue: "Estiven perto de morrer" A volta á competición e o futuro Gustavo Dacal considérase “satisfeito” do resultado da súa volta. O atleta recoñece que foi toda unha sorte facela “na casa e cos que tanto me apoiaron”. Relata a Nós Diario que a súa recuperación para o deporte tras o que lle aconteceu en México comezou “nada máis saír do hospital da Coruña e coa recuperación física”. As primeiras dificultades para incorporarse á competición xurdiron coa propia cadeira que emprega para os lanzamentos. “Aínda estamos en proceso de adaptación, facéndolle modificacións ao banco e axustando os niveis de forza aínda que sempre dentro das normas reguladas polo comité paralímpico internacional”, aclara o deportista pontecaldelán. O atleta buscaba unha xornada especial para o seu retorno e atopouna coa colaboración do presidente do Atletismo Rías Baixas, Gonzalo Méndez, que reuniu atletas de todo o país en Pontevedra coincidindo co Día Internacional da Diabetes. Agora, Dacal ten a mente posta en seguir adestrando duro para poder competir a nivel internacional aínda que xa sabe que non poderá estar nos Xogos Paralímpicos de París 2024, malia ter opcións de podio pola súa marca, ao non constar na súa categoría (a F55) no programa desa competición mundial nesta ocasión por non ser operativo que se fixeran todas as que existen. "Son varias categorías as que participan e para esa cita non puxeron a xavelina e si o lanzamento de peso mais non é unha proba que se me dea moi ben", asegura Dacal. Ademais, segue levando o adestramento doutros deportistas internacionais "desde a distancia" e tamén presencialmente, como é o caso do récord nacional de ecuador, José Orlando Escobar, sen esquecer a súa colaboración co Centro de Tecnificación pontevedrés.