A tempada atlética galega abre o pano, como vén sendo habitual nos últimos anos, co Campionato Xunta da Galiza de Campo a Través tanto na modalidade individual como por equipos, proba que se desenvolverá en Ribadavia o próximo domingo, día 7 de xaneiro, e que foi presentada esta quinta feira nun acto que contou coa presenza do alcalde da localidade anfitrioa, Eladio Gómez; o concelleiro de Deportes, Javier Pousa; e o vicepresidente da Federación Galega de Atletismo (FGA), entre outros.
Segundo cálculos deste organismo, "preto de 400 atletas" serán da partida nun evento que se distribuirá nas categorías de idade Sub-16, Sub-18, Sub-20, Sub-23 e absoluta.
Entre estas deportistas destaca a presenza das vixentes campioas absolutas, Laura Santos (Praias de Castellón) e Esteban Iglesias (Lucus Caixa Rural). Tratando de arrebatarlles o seu posto de privilexio estarán o internacional El Mehdi El Nabaouim, que debuta como representante do Atletismo Santiago, ou Inés Docampo (Adas Cupa), que xunto a Isabel Caeiro (Sociedade Ximnástica de Pontevedra) representa a principal ameaza ao título de Santos.
No resto de categorías que repartirán medallas no circuíto da Veronza -situado a carón do paseo fluvial que acompaña o río Avia- a presenza máis salientábel é a de Xela Martínez, que parte como clara favorita na Sub-20 feminina, o mesmo que Sabela Castelo (SXP) na Sub-16 e Álex Sierpes (Atletismo Trega) na Sub-18.
En canto ao resto de contendentes, os e as afeccionadas non deben perder ollo ás evolucións das gañadoras Sub-18 do Galego de Campo a Través do ano pasado -disputado en Xinzo de Limia-, Leyla Villar (Ourense Atletismo) e Lucas García (Ría de Foz). Ademais, tamén prometen dar que falar Gabriel Losada (Gándara), Iván Rego e Carla García (ambas do Lucus Caixa Rural), Ainhoa Gotán (Sociedade Deportiva Compostela) e Yago Ignacio García (Club Atletismo Santiago).
A maiores, este torneo contará co valor engadido de ser selectivo para formar parte da selección galega que tomará parte no Campionato de España de Campo a Través do vindeiro 28 de xaneiro en Xetafe, a onde se desprazarán os e as tres primeiras clasificadas nas categorías absoluta, Sub-23 e Sub-20, ampliándose o abano aos catro primeiros nas Sub-16 e Sub-18.
