O 1 de novembro, Día de Todos os Santos, milleiros de persoas de todo o país achegaranse aos cemiterios para recordar eses seres queridos que xa deixaron este mundo cun ollo, cousas dos tempos modernos, posto no fútbol.
Con recollemento e contrición, os e as sobreviventes do Súper Dépor (1992-2004), o Euro Celta (1998-2004), o Compos de Primeira (1994-98) ou o Lugo de Segunda (2012-23) pregarán porque Giambattista Vico estivese no certo coa súa Teoría do Retorno Cíclico da Historia e a Providencia interceda para que os equipos dos seus amores rexurdan das súas cinzas e reverdezan vellos loureiros nunha nova edición da Copa do Rei que arranca hoxe para a meirande parte das escuadras galegas.
Compostela-Tenerife
O primeiro en debutar na competición do KO será unha SD Compostela que recibirá ás 12 horas no Vero Boquete o sexto clasificado da Segunda División, o Club Deportivo Tenerife, baixo a atenta mirada das cámaras da Televisión da Galiza (TVG). Cun único precedente no torneo do KO favorábel aos intereses do conxunto capitalino -que eliminou o insular a dobre partido en xaneiro de 2000 grazas a un estelar Peter Hoekstra-, o feito de que o Compos conte os seus encontros por vitorias desde a incorporación ao banco de Michel Alonso fai soñar coa que sería unha das grandes sorpresas da primeira rolda copeira.
Turégano-Celta
Pola tarde, xa ás 15.30, será a quenda do Celta, que viaxará até Castela para colisionar co modestísimo Turégano. O choque está programado a esa hora non no Estadio do Burgo, onde se desenvolve habitualmente como local, senón no veciño da Albuera, para que a formación segoviana, que milita na Preferente, non teña que afrontar os custos da instalación dunha iluminación artificial da que non dispón e poida acoller un maior volume de seareiros e seareiras que están a morte co seu club ante o compromiso máis importante da súa historia.
No caso celeste, suporá a oportunidade de lograr o seu primeiro triunfo -ao que está absolutamente obrigado- en dous meses, dándolle a quenda a Benítez de probar variantes tácticas e xogadores no que non debería pasar dun adestramento glorificado, mais sabendo que de perder, un escenario remotamente improbábel pero factíbel, a presión da olla exprés celeste aumentaría dramaticamente.
Atlético Antoniano-Lugo
Pedro Munitis, técnico do Club Deportivo Lugo, quixo poñer a venda antes da ferida e manifestou na rolda de prensa previa á eliminatoria a súa preocupación polo feito de que o duelo co humilde Atlético Antoniano (16 horas) vaia ser sobre céspede artificial.
Avilés Industrial-Arenteiro
Como se do vello Pro Evolution Soccer se tratase, o Arenteiro chega coa frecha vermella ben arriba logo de atropelar (4-0) o Unionistas o pasado sábado, o que abre de par en par a porta da confianza en que sexa quen de superar unha entidade que milita na súa mesma categoría a pesar de xogar fóra da casa (16.30 horas).
Covadonga-Deportivo
Tamén aspira a aproveitar a inercia positiva o renacido Dépor, que de vencer o Covadonga en Asturias (17 horas) asinaría o seu terceiro triunfo consecutivo por vez primeira desde xaneiro.
Boiro-Mallorca
Para os do Barbanza xa é un premio estar na Copa. Mais, que sería eliminar todo un Primeira como é o Mallorca? O soño comeza ás 18.30 horas.
Marbella-Rácing de Ferrol
A pesar de ter só un central dispoñíbel, o Rácing de Ferrol é favorito para avanzar á segunda rolda ante o Marbella (20 horas).
