O partido entre COB Ourense e Hereda San Pablo Burgos non será recordado polo importante triunfo dos da Cidade das Burgas (95-91), moi necesitados de vitorias após destituír días antes o seu técnico, Guillermo Arenas, non.
Este choque pasará á historia por ser o primeiro dirixido por unha muller na LEB Ouro, a categoría de prata do baloncesto masculino a nivel estatal.
A encargada de derrubar outro teito de cristal foi a preparadora compostelá Iria Uxía, substituta -de momento interina- no cargo de Arenas.
Con experiencia en LEB Prata, a Liga EBA e a devandita LEB Ouro -aínda que en calidade de asistente-, tamén foi a primeira adestradora nos conxuntos alemáns ETB Miners e Rockets Gotha.
Agora, o tempo dirá se a directiva ourensá lle outorga o bastón de mando ou optará por outra persoa para o posto.
Necesario triunfo
Con respecto ao partido, o Club Ourense Baloncesto recuperou a senda da vitoria após catro partidos ante 1.528 espectadores e espectadoras no Paco Paz.
Individualmente, Fahrudin foi o mellor cos seus 19 puntos, empatado con Zamora; seguiunos Pilepic con 13; Williams con 9 e Willet con 8.
